انلیک- کیرشانین سیرری
ناصر مرقاتی
ناصر مرقاتی
انلیک- کیرشانین سیرری
بیر نئچه آی اؤنجهدن بری بو باکی کاناللاریندا بیر اؤزهل دیش فیرچاسینی رئکلاملاییرلار. رئکلامچینین دئدیینه گؤره بو، هم دیشلری همده یاناقلاری سیلیب تمیزلییهن، بیر فیرچا دیر. آنجاق ایلک گؤنلرده بیلمیردیم نهدن من هر یول بو رئکلاملاری گؤروب یا ائشیدنده یادیما انلیک- کیرشان دوشورو.
یادیما گلیر قدیم زامان بیزیم شههرده بو ساچ دوزتمه مئزونلاری هئچ تاپیلمازدی. تبریزده، (و حتمن آیری شههرلردهده)، هر بیر محللهده یالنیز بیر قاشآلان خانیم واریدی، ندنسهده چوخونون آدی فاطمایدی. بو «قاشآلان فاطما»لار ائولره گلیب کیشیلرین گؤزلریندن ایراق خانیملاری اوزاداردی قاباغینا، اوزلرینه ساپ سالیب و قاشلارین آلاردی. تویدا، بایرامدا دا گؤرهردین قادینلار باشلارینا حنا قویوب گؤزلرینه سورمه، قاشلارینا مَسمه «وسمه» چکیب و قاشآلان فاطمالاردا اولارین اوزلرینی خورتلامیش اؤلو کیمی کیرشانلا آغ-آپ- باغ آغاردیب و یاناخلارینی انلیکله آلما کیمی قیپ- قیرمیزی قیزارداردیلار. بئلهیدی او زامانین بزهنمهلری. ایشیم یوخدور کی، بو بزهک-دوزهکلر فرانسه لوئیلرینین سارایلاریندان یا هاردانسا بیزه ایرثه یئتیشمیشدی! آنجاق من هئچ باش چیخاردا بیلمزدیم نهدن قادینلار اوزلرینی ائله گژ کیمی دوٌمآغ و یاناخلارین ائله قان قیرمزی ائلیردیلر؟! سورالار بیرآز یاشا دولوب، واقیف، موعجوز و یا عاشیقلارین شعرلرینده آغ بهنیز، آلما یاناق و بو کیمی گؤزللمهلری ائشیتدیکده قاشآلان فاطمالار هونرینین دهیرینی باشا دوشدوم.
هئش سؤزوم قاشآلان فاطمادا دا دئیلدی، انلیک- کیرشاندایدی. دوغروسو ایلک دفعه یادیما انلیک- کیرشان دوشنده فاطما خانیملار گلیب تیکیلدیلر گؤزومون قاباغینا. نهسیرر واریدی دیش فیرچاسینین رئکلامیلا انلیک- کیرشان آراسیندا؟ من بیلهسی مودئرن انلیک- کیرشانلاری فیرچایناندا اوزه و یا یاناغا یاخماق اولار آنجاق فیرچاینان اوزدن و یا یاناخدان سیلینمهسین گؤرمهمیشم. ایلک گونلر، هر یول بو رئکلامی گؤردوکجه کؤنَزلیکنن هارداسا بیر گؤزهگلمز و سیررلی ایلگی دالیجا گزدیم، آما دویونو آچابیلمهدییمه گؤره گئتدیکجه بیر باشین بوشا بوراخدیم
او گون، نسه یئییردیم، بیردن اووودومو دیشلهدیم. آستاجا باغیردیم. خانیم میطباخدان سوروشدو: "نه اولدو؟" دئدیم: "هئچنه اووودوم قالدی دیشلریمین آراسیندا!" بونو دئدیکده یئنهده دیشفیرچاسی و انلیک کیرشان تاخیلدی بئینیمه و نئچه گون منی گیجللندیرن او گیزلی سیرر بیردن آچیلدی. بو سیرر یاناق سؤزوندهیدی، رئکلامدا دئدیینه گؤره بو یئنی فیرچالار هم دیشلری و همده یاناغی تمیزلیرلر، بو عاغیلا سیغیناسی اولابیلمز. دئمک هانسیسا چوخ بیلگین بیر ترجومهچی، البتتهکی تئرمینولوقییا کومیسیاسی رهبرلییی آلتیندا، لاپ قدیملر پالتوو و یا پئنجهیی ترسه- اوواند ائلییهن کیمی یازیق اینسانلارین اوزونده «اووودا»نان «یاناق»ین یئرینی ترسه- اوواند ائلییبلر. او دا هاردا؟ رسیمی و غئیری رسیمی تئلویزیون کاناللاردا. او دا کیمین رهبرلییی آلتیندا؟ البتته کی بیر رسمی اورقانین نظارتی آلتیندا!!!
بلکهده آدینی ترئیلی چکمییَن «آذربایجان علملر آکادئمییاسی یانیندا تئرمینولوقییا کومیسیاسی»نین ایددیعا ائلهدییی «گؤرولن چوخ موهومم ایشلر»ین بیریده اووودنان یاناغین یئرلرین ترسه- اوواند ائلمکدیر!!!!
7 دئسامبر 2010 برلین