X
تبلیغات
رایتل

 گؤروش

  ناصر مرقاتی





سیچان دَلییین ساتین آلان، قارداشینا آدین دانان چاغدا، بیر اوغلان گؤردوم گؤروش آختاریردی. بیر باغ باغلادیم اوزگون اللردن و بیر تاپشیریق یازدیم، اوخوسون دئدیم اوغلان.

ناصر مرقاتی




گؤروش



گئدیرسن گؤروشه سیلکین اؤزگه دن

گؤزلر تَله سنی تئز تانییارمیش

بیرده کی قورونسون مئهریبان گؤروش

بد نظر گؤزلردن 

گؤز دَیمه لردن.


آی گؤروش

آی گؤروش

سؤنموش چیراغلاری یاندیران گؤروش

دونموش اورگلری قیزدیران گؤروش

داغیلمیش اینجینی دویونلو ساپا

دوزدورن گؤروش

اوزولموش اللری بیری بیرینده

قیزدیران گؤروش

گئدیرسن گؤروشه سیلکین اؤزگه دن

قوی ایستی اورکلر بوزا دؤنمه سین

گؤزلرده آلیشان ویصال آرزیسی

بیرده سؤنمه سین

بیر داها

ال الدن قوی اوزولمه سین

اوز اوزدن دؤنمه سین. 


                                                                            ناصر مرقاتی-  تبریز -  2/5/ 1366