X
تبلیغات
وکیل جرایم سایبری
 

  

  ناصر مرقاتی

  تؤره نیش کیتابی و میللترین مبسوط  تاریخی



ناصر مرقاتی

تؤره نیش کیتابی و میللتلرین مبسوط  تاریخی



... 

و ائله کی فیرتینا بیتدی، قاسیرغا یاتدی و گمی قارایا چؤکدو، نوح نبینین ائولادی"دوغودان کؤچوب و شئنعار دوزونده کوچ سالدیلار. و سؤیله دیلر: "گلین پیشمیش کرپیجدن و قیردان باشینی گؤیلره سورتن بیر قالا دوزلدک، بیزیم بیرلییمیزی قوروسون. و اولارین هامیسی بیر دیلده قونوشوردولار و جوجوقلاری "دیلیم اؤلسه منده اؤللم" اوخوردولار. و تانری گؤیده بو سؤزلری ائشیدیب و خوشونا گلمه دی و قورخدو و دوشوندو: "اگراولار بؤیله بیرگه اولسالار تانری بویوروقلارینا باش ایمییه جکلر". در حال یئره قوندو قالالارین اوچورتدو، و اولارین دیللرینی چئشیدلی دیللره چئویردی، اؤیله کیم، کیمسه کیمسه نی باشا دوشمه¬دی  و بؤیله سینه اونلار یئراوزونه داغیلدیلار." و بیر بیرلرینه قَنیم اولدولار.  

و ائله کی بیر زامان کئچدی تانری باخیب گؤردو؛ دیل چئشیدلییی کارکسمه دی و بولار بیر بیرینین دیلین اؤیرنیب، یئنه ده بؤلگه- بؤلگه ییغیشماغا باشلاییبلار. و تانری موسانی یاراتدی و موسانین ساغ قابورغاسیندان عیسانی و هر بیرینین قابورغالاریندان سایی 124000 چاتان چوخلو پئیغمبرلر یاراتدی تا اولارا چئشیدلی دینلر گتیرسینلر و هر بیر دین اوچون «آیت الکرسی»یازیسینلار تا دیل بیرلییی و بیرلیک قالاسی دوزلتمه یی اونودسونلار. و همی ده یئرله گؤیو آییردیلار و اونلار اوچون«حقیقت اولی» نی یاراتدیلار و سقراط و افلاطون و باشقالارین تؤرَتدیلر و دوشونوش بیرلییین آرادان قالدیردیلار باش بولنلری بیر بیرینین قارشیسندا قویدولار تا دوشونجه وورغونلارین ابدالعومر ایکی یول آراسیندا سورگون ائتسینلر. بو باجاریقلار  بیر زامان یئترلی اولسالاردا، یئنه ائولادی نوح آرتیشیب و خوسانلاشماغا باشلادیلار. پس تانری اینگلیسی و فرانسه و روسی و سورالار آلمان، ایتالیا و پرتقال و اسپانیانی یاراتدی. و تانری اولارا گمی دوزلتمه اؤیرتدی و باریتی کشف ائتدیریب، توفنگ و توپی تؤکمه یی دویدوردو و اولارین بیر الینه موقددس کیتاب و او بیری الینه قلینج و توپ- توفنگ وئریب، تانریدان خبرسیزلردن اؤج آلماغا یوللادی. و تالان اولدو  هر بیر بوجاقدا  ییغیشیب و دینج عومور سورنلرین وار یوخو و قول اولوب ساتیلدیلار هر بیر یئرده و اؤزللیکله گونئی آمئریکا بازارلاریندا و تارلالاریندا. و بونلار اؤز ایلاهی گؤرولرین اونودوب و بیر بیریله ووروشماغا باشلادیلار و بوس- بوتون «تداخل وظیفه» اورتایا چیخدی. پس تانری "«تداخل وظیفه»نی اورتادان قالدیریم و خلایقی یاخینلاشماغا قویماییم" دئیه، اونلاری اوتوردوب و اونلارا بیر یول تاپماغا بویوروق بویورماغی دوشوندو. و یهود قومونو اونلارین باش بولنی سئچدی. و اولار سؤیله دیلر: بیز بو خلاییقین آراسیندا سینیر چکیب و چئشیدلی میللتلر یاراتمالیییق و "سن باشقا میللتلردن یئی سن!"  دئیه، اورتالاریندا ابدی آیریلیق سالمالییق و بو سینیرلی خلاییقی اؤز ایچمیزده بؤلمه لیییک تا «تداخول وظیفه» اورتایا چیخماسین و چاققیشما باش وئرمه سین. و بؤیله ائتدیلر اونلار پس «تذکره» یاراندی. و اینگلیس هیندوستانی یاراتدی و اونون سول قابورغاسیندان پاکیستانی و افغانیستانی یاراتدی و تاپینماق اوچون داشی و اینه یی، سیچانی، ایلانی، مئیمونو و مینلرجه آیری جانلی و جانسیزی یارادیب و تَبه-رروک ائتدی و بوتون اولدوغو یئرلری سینیرلاییب و چئشیدلی «...ستان*»لار یاراتدی و باشلاری اوسته یالتاقلار و فیریلداقلار دوردوردو. و فرانسه لوبنانی و آفریقادا الجزایر و باشقلارین یاراتدی. و ایران و ارمنیستان و بیر سیرا باشقا سینیرلاریاراتما و میللتلر گؤیرتمه¬یی روس قارداشلارین گؤروینه بوراخدیلار. و روس ایرانِ قاجاری یاراتدی و "اینگلیس هیندوستانیندان گئری قالماسین" دئیه، اینگلیس و فرانسه و یهود و باشقالارینین یاردیمیلا یاراتدیغی ایران ایچینده حنفی، حنبلی، رافضی، ایثناعشری، شعوبی،متشرع شافعی نعمت اللاهی، علوی، موسوی و بهایی و زرتشتی و دؤنمه-لری و - سایی الینده تانری اولان - نئجه باشقاسینی یاراتدی و بو یولدا نجفدن و «هیند شرقی)دن چوخلو یاردیملار و ایش بیرلیکلری گؤروندو. و هابئله روس، فرانسه یاردیمیلا ارمنیستانی و گورجوستان و باشقالارین یاراتدی. آنجاق، "منیم پاییم آز اولدو" دوشونوب، یئنه دارتیشما و چاققیشماغا باشلادیلار بونلار.  پس اینگلیس اؤز ساغ قابورغاسیندان ریضا خانی یاراتدی و بئله لیکله چیخارتدی ایرانی روسون الیندن. و ریضا خان فارسی یاراتدی و یهود یاردیمیلا  ایسگندر و عرب و موغول آخینینلارین گؤیرتدی و هابئله فیردوسینی یاراتدی تا یالنیز "هونر نزد ایرانیان" اولسون و همده ریضا خان بولارین یاردیمیلا و اؤزللیکله شیکاقو اونیوئرسیته سینین اؤزل یاردیملاریلا تخت جمشیدی و بیر ایکی باشقا بینا گؤیرتدی و هابئله اؤز قابوراغاسیندان کسروی لر، افشارلار،  قزوینلر و افشارین قابورغاسیندان عبدالعلی کارنگ لر و باشقالارین یاراتدی و اونلار اینگلیس و فرانسه و آلمان و یهودون یاردیمیلا فارسا کوروش، داریوش و اشکانی و ساسانی یاراتدیلار و اولارین آج گؤز عتیقه چیلر وسمسارلارینین آرخاداشلیغینان تاریخ یازیب و موزه لرین دولوشدوروب دوشه دیلر، نئجه کی هیندوستانا و باشقا یئرلرده باشقالارینا یازیب و دولوشدوروب و اولوشدورموشدولار. و هابئله «آذری» کلمه سینی ایختراع ائدیب و آذربایجاندا یاشایان تورکون آدین «آذری» قویدولار و اونا تاریخ یاراشدیردیلار. و ایستالین و آتاتورک بونلاری اؤیرنیب و بوتون آذربایجانلی تورکلرین و اؤز اؤلکه لرینده یاشایان بئله بیر تورکلرین آدینی «آذری» قویدولار. و بونلارین اؤزلرینین قابورغالاریندان آداملار یاراتدیلار تا «آس» و یا «آز» قومو  آدیلا قایناقلار یاراتسینلار و خلایقی اونلارلا اویناندیرسینلار. و هله¬ده کی هله دیر سولطان محمود و نادیر و باشقاسینی اؤیسونلر. و بئله¬لیکله تاریخ میلل و اومَم هله ده بؤیله سورمکده¬دیر. و تانری تعالا ایلشیب ملکوت اعلادا و اؤزونه هله ده"فتبارک اللاه احسن الخالقین" سؤیلمکده دیر.    


ناصر مرقاتی- برلین 10- 5- 2012