X
تبلیغات
رایتل

 

 

  

  آغیر گئجه 

  ائلیار پولاد

  

·         آغیر گئجه 

·             ائلیار پولاد

                                                                                                                

گئجه نین قارانلیغی نین آغیرلیغین چیینلرینده حیس ائدیردی. ائله بیل دونیانین آغیرلیغین اونا یوکله میشدیلر. قورغوشون دولو هاوا اونا نفس چکمه یی چتینله شدیریردی. هر آدیم گؤتوردوکجه سانکی چیینینده کی یوک بیر آزدا آغیرلاشیردی. دهشتلی آنلارین دؤزولمه زلیی اونو سارسیدیردی. ایندیه ده ک بو قده ر ایاقلارینین تابسیزلیغین بیلمه میشدی . هاراسا گئدیردی اوزوده بیلمیردی آنجاق ایندی فیکیر- خیال اونا حوکم وئریردی.

سانکی گؤزلری باخار کور ایمیش اطرافیندا دولاشانلاری، کوچه ده گلیب-اؤتنلریده بئله هئچ گؤرموردو. نه ائده جه ینی- هاراسا گئده جه ینی ده  آنلامیردی، آنجاق بو آغیر یوکو بیر یئره داشیماق زوروندایدی. بو فیکیر زولاق- زولاق هاوانی دولاشان بیر سیگارئت توستوسو کیمین اونون ایچری عالمینی بورویوردو. هر آدیم آتدیقجا او سانکی اوزونده ن اوزاقلاشیر، منلی یی- کیملی یی شوبهه آلتینا دوشوردو. زامان – زامان دوشونه ره ک، اوزاقلارا گئدیر، باشی هرله نیر، اویاخلیقلا –یوخو آراسیندا کابوس دولو آنلار کئچیریردی.

هرده ن وار گوجونو آووجلاریندا توپلاییب اونه آپاریر نه سه بیر یئرده ن توتوب وار گوجویله ایسته ردی کی او یوکون آلتیندان خیلاص اولسون. آمما اونون دا نتیجه سیز اولدوغونو دویوب ائتدیی حرکتده ن پئشمانچیلیق چکیردی.

گؤزونون اطرافیندا یومشاق بیر یوخلوغون وایتیرمه نین حیس ینه  آلیشیردی. بو ایتیرمه اونون کیپریکلرینی آغیرلاداراق قاپاماق زوروندایدی. آما گؤزلری نین اونونده حرکته باشلایان" دومانلی فیرلاماجلار"کیپریکلری نین اؤرتولمه سینه مانعه تؤره دیردی . هرده ن بیر دؤنوب گئریه هاراسا اوزاقلارا زیلله نه ره ک آجیلی- شیرینلی خاطیره آختاریردی. هارداسا بیر خوش خاطیره یادینا سالیر، نه سه اطرافی بورویه ن "دومانلی فیرلاماجلار" اونو تئز فیکیر – خیالدان یاییندیریردی.

هر ایکی یانیندان آسلانان قولاری اوقده ر آغیرلاشمیشدی کی دیزلری نین تاب گتیرمه سینه گومانی گلمیردی. ائله بو نه ده ن دنده بیر یئره، بیرینه سؤیکنمه یی آرزولاییر کیمی اطرافی سوزدو . یاخینلیقدا ایللر بویو گؤرمه دیگی، تنه سی یوغون پلمه له ره اوجالمیش  تاریخ لرده ن قالمیش بیر چیناری گوردوکده، اونا طرف یاخینلاشدی. آغاجا سؤیکه نه ره ک دیزلری تاب گتیرمه دی ، مولاییم سوروشمه ک حالیندا آغاجین دیبینده تورپاغا سریلدی .

ایندی بیر آز توختامیشدی. او فیرلاماجلاردا یوخ اولموشدو. یاواش-یاواش دان یئری سؤکولوردو. هارداسا اوزاغدان بیر قوش سسی ائشیدیلیردی. دهشتلی گئجه نین اؤتمه سی و گونشین گلمه سینی دوشونوردو.

او اوشویه ره ک، نه سه ایچریسنده بیرحیسین قزینماغینی آنیردی. او گونش کیمین یئنی ده ن دوغولوردو،

آلیشماغا، نورساچماغا.....

23/11/85