.

.

  


  تاریخین چوخ گیزلی شایعه لریندن.

  ناصر مرقاتی 





 بو قارا وللی 1376 نجی ایلده یازیلیب. سانیرام بیر یول یاییلمیش اولسون.

                                                           (ناصر مرقاتی / مردادین 14/ 1390)

 

ناصر مرقاتی

 

تاریخین چوخ گیزلین شایعه لرینندن.

 

 

 

دئییللر قوچ کوراوغلو  اؤز شعر کتابین یازیب قورتاراندان سورا، بیر پارا مقدمه یازدیرانلار کیمی، ایسته دی کی باش بولنلردن، سؤز صرافلاریندان، درین معنا خیریدارلاریندان، اهل حاللاردان بیری بلکه ده بیر نئچه­سی اونون شعر کتابینا، باش­سؤز (مقدمه) یازسین. بوخبری ائشیدن عاشیق جنون سازین گؤتوروب "سفره چیخدیم" دییه اکیلمیشدی. هالای پوزان کور اوغلونون  بیغ لارینین چیلله سیندن توپ داغیدان قیلینجینین کسمه سیندن دلی حسن ایسه کور اوغلونون نعره سیندن "قورخورام" دئییب، بویون قارچیرتمیشدیلار. بللی احمد و باشقا دلی­لرین هر بیری­ده  آیری ـ آیری ماهانالار گتیرمه­یه معروض قالمیشدیلار. اؤزگه دیارلاردان دا سئر فیلیپ سیدنی، بلینسکی و ساموئل جانسون کیمی آدلیم ادب عالیملری واختلارینین  اولمامازلیغیندان عذر ایسته میشلر. ایشی بئله گؤرن قوچ کور اوغلو  اؤنجه ایسته­دی کی شعر کتابینی مقدمه یازمادن تاپشیرسین ناشیرین الینه، آنجاق حئییفسیلندی آخی بو زنگینلیکده کتابی نئجه مقدمه سیز بوراخسین؟ بیر یاندان دا کتابین ناشری استانبولدان چانلی بئله تلفن ائله­دی کی "مبادا ـ مبادا کتاب مقدمه سیز بوراخیلسین. ائله اونا گؤره ده قوچ کوراوغلو بئله قراره گلدی کی اؤزو، اؤز دفتر اشعارینا و شرح اسفارینا  "کوراوغلو واری" بیر مقدمه یازسین. قوچ کور اوغلو میصری قلینجین اوجون مورککّبه باتیریب بئله یازدی:

 

دامدی اوره­ییمه عشقین قطره­سی

یوکسلدی سینمندن ملک لر سسی

دیلیمدن آخمادا داوود نغمه­سی

کلمه­نی کلمه­یه جالییان منم

 

عورفان باده­سینی دولدوروب ایچن

عشقین یئدی شهرین دولانیب گئچن

"کرمم اصلینی بدل­دن سئچن" (1)

هونر عوممانینی آرییان منم

 

شعرین مئیدانیندا قیها چکرم

اسکی شاعرلره دربست نؤکرم

یئنی شاعرلری قیریب تؤکرم

"لش لشین اوستونه قالییان منم" (2)

 

فضلین باخچاسیندا بیر گول دسته­سی

ادب مئیدانینین دوشگون خسته­سی

کوراوغلویام شعر و قلم اوستاسی

هونر خزینه­سین تالییان منم .

 

الاحقر:

قوچلار قوچو  قوچ کوراوغلو

 

 

 

 

 

 ـــــــــــــــــــــــــــــــــــــــــــــــــــــــــــــــــ

(1)  – بئله نظریمه­گلیر بو میصراعنی بیر یئرده گؤرموشوم، آنجاق کیمدن اولدوغون بیلمیرم.

(2)  – بو میصراع کوراوغلونون شعریندن آلینیبدیر.