سو پریسی
داود اهری
داوود اهری
- سو پریسی
نئچه ایل ایدی کی گنج اوغلان بو شه‌هه‌ره، ده‌نیز کنارینا گلیردی. اونون یاشادیغی شه‌هه‌ر ده‌نیزدن چوخ اوزاق ایدی. اولدوغو شه‌هه‌رین هنده‌ورینی اوجا داغلار توتموشدی. بو سفر اونون اوره‌یینده گیزلی بیر دویغو واریدی. ائله بیل‌کی بیر نفر اونو گؤزله‌ییردی یا بیر گؤزله‌نیلمز حادثه اوز وئره‌جک ایدی. ایستی یای گونلری ایدی.
دونن بو شه‌هه‌ره گلدی. گئتدی ساحیله، ده‌نیز کنارینا. ماوی ده‌نیزده بیر آز اوزدی. ناهاردان سونرا، اولدوغو مسافرخانانین بیر اوتاغیندا کی آتوشگه سی ده‌نیزه ساری آچیلیردی، دینجلدی. او ده‌نیزی چوخ سئویردی.گون باتان چاغی، جماعت ساحیلده اوتوروب، ده‌نیزی سئیر ائدیردیلر. او اونلاردان اوزاق، بیر داشین اوستونده اوتوردو و آیین بیر ایشیقلی چای کیمی، ده‌نیز اوزه رینده ساچدیغی گؤزه‌ل و سئحیرلی آخار-باخارا حئیران قالدی. ده‌نیز گئتدیکجه بیر یئنی رنگ‌ایله بویانیردی. او کیچیک آرگانینی جیبیندن چیخاردیب و باشلادی چالماغا. گئجه‌دن چوخ کئچمیشدی کی اوتاغینا قاییدیب و یاتدی.
بو گون ده ماوی ده‌نیزده اوزوب سونرا ساحیلده اوفوقا باخیب و قوملاردا سونسوزلوق علامتینی بارماغی ایلا یازدی. سونرا باهارین آدینی و حیاتینی غایب ائتمیش دوستونون آدینی. و ایندی آخشام چاغی بیر آز شه‌هه‌ری دولاناندان سونرا، گلیب ساحیلده، خلوت بیر داشین اوستونده اوتوروب و آرگان چالیردی. حیرتله ده‌نیز اوزه‌رینده کی آیین ایشیغینا باخیردی. ایسته ییردی کی بو ایشیق چاییندا اوزسون، اوزسون ... و او اوزاق اوفوقلرده گؤزلردن ایتسین. او ده‌نیزدن نه ایسته‌ییردی؟ ده‌نیزی نییه بو قده‌ر سئویردی؟کئچمیش خاطره‌لر اونو دوشوندوروردو. او غریب اؤلکه‌ده سئودیگی او قادین یادینا دوشوردو. نئچه ایل ایدی کی اؤز اؤلکه‌سینه، اؤز شه‌هه‌رینه قاییتمیشدی، داها اوندان بیر خبری یوخ ایدی.
جماعت چکیلیب گئتدی. آی دوز باشینین اوستونده‌ایدی و اونا، آغزی آچیق، حئیرتله باخیردی. باشلادی آرگان ایلا بیر اسکی آهنگی چالماغا. بیردن گؤردو ده‌نیزدن بیر قادین، یوخ ائله او قادین، آلتین بویالی ساچلی قادین اوزه – اوزه اونا طرف گلیر.
گنج اوغلان سئوینجدن باشلادی آغلاماغا. سوروشدو:
- باهار! من سنی تانیییرام.سن بورادا، ده‌نیزده نه ائله ییرسن؟!
سو پریسی گولومسه‌ر دئدی:
- قارانقوش! من ده سنی تانیییرام. سن گئده‌ندن سونرا، بیر گئجه یاتاندان سونرا، اویاندیم و اؤزومو بورادا، ده‌نیزده تاپدیم. بورادا سو پری‌لری چوخدور. بیز گئجه‌لر آی اولمایاندا اولدوزلاری سایاریق. اونلار قورتاران دئییل لر. سن بو گئجه او اسکی آهنگی چالدین و من ائشیدیب گلدیم. حیاتینی غایب ائتمیش دوستون دا ده‌نیزده اوزدی، اوزدی و او اوزاق اوفوقلرده گؤزلردن ایتدی. صاباح صبح ده‌نیزدن گونشین دوغولماسینی سئیر‌ائت، گؤر کی نه گؤزه‌لدیر.
گنج اوغلان دئدی:
- گؤزلوگون چوخ گؤزه لدیر.اونو منه وئره‌رسنمی؟
سو پریسی گولومسه‌ر دئدی:
-گؤزلوگومو ده سئویرسن؟!
گنج اوغلان دئدی:
- من ان گؤزه‌ل گؤزلوگو، سیزین اؤلکه ده، سیزین شه‌هه‌رده، بیر روشندل قادینین سیماسیندا گؤرموشم. منی هر زامان دوشوندوروردو و ایندی داها 8 مارت و سونسوزلوق علامت‌لریندن الهام آلیرام. اوفوقون سونسوزلوغو و عشق همیشه منی دوشوندورور. ایسته‌ییرم بو شه‌هه‌رده قالام و هر گئجه گلیب سنینله آی ایشیغیندا دانیشام.
سو پریسی دئدی:
- بیلیرم. سیزین شه‌هه‌ریزین کناریندان بیر چای کئچیر. او چای گلیر توکولور بو ده‌نیزه. هر زامان بورایا گلنمه سن، منیمله دانیشماق ایسته سن، گئت او چایین کناریناو آرگانین ایلا او اسکی آهنگی چال. من سنین سؤزلرینی دویاجاغام. سولار زمزمه سی سنین سؤزلرینی منه یئتیره جکلر. آدینی قویوبسان قارانقوش، منیم آدیمی دا باهار. سنین قانادینی دا ساغالتدیم تا اؤز اؤلکه‌نیزه قاییتدین. سن ده انسانلاری سئویرسن. اونلارا یاردیم ائت. منه گؤزو اولوب گؤرمه ینلردن، گؤزو اولماییب اوره ک گؤزو ایله گؤره‌نلردن دانیش. دونیادان، حیاتدان کائناتدان دانیش. هردن گئجه‌لر یوخووا گله‌جه‌یم. قاییت گئت شه‌هه‌رینیزه. بیلیرسن سنی کیملر گؤزله‌ییرلر؟
گنج اوغلان دئدی:
- هردن یوخودا گؤروردوم سیزین شه‌هه‌رده یم. رؤیادا ایسته‌ییردیم گله‌م سنی یاخیندان گؤره‌م. آمما ایشیم اولوردو و قورتارینجا یوخودان آییلیب کدرله‌نیردیم. داها ده‌نیزده ده اوزاقلارا اوزه نمیرم. ده‌نیزدن قورخورام.
سو پریسی دئدی:
- بیلیرم کی منی نه‌قده‌ر سئویرسن. آمما داها هر بیر یئرده، هر بیر انسانی گؤردونسه، او سنه منم، دوستوندور. بیر بالیق قولاغینا قولاق آسدیقجا، بیزیم سؤزلریمیزی باشا دوشه جکسن.سنه هله چوخ سؤزلریمیز واردیر.بیر گون سن ده ده‌نیزده او اوزاق اوفوقلره اوزه جکسن.سنی هئچ زامان اونوتمارام،یالنیز بوراخمارام.بیر دؤنه ده او اسکی آهنگی چال و داها گئت یات.صاباح صبح گونشین دوغولماسینی ده‌نیزدن گؤزله.
گنج اوغلان بیر دؤنه ده او اسکی آهنگی چالدی.سو پریسی دالغین اونا باخیردی و آهنگه قولاق آسیردی...!
گنج اوغلان سو پریسیندن وداعلاشیب و مسافرخانایا، اؤز اوتاغینا قاییتدی. یئنه گئجه گئج یاتدی. آمما سحر تئزدن اویاندی و گونشین دوغولماسینی گؤزله‌دی. گونش، قیزارمیش گونش دوغولماقداایدی. ساچلاری ده‌نیز اوزه رینده بیر ایشیقلی چای کیمی ایدی. ده‌نیز لپه‌لنیردی. گنج اوغلان بو گؤزه‌ل و اونودولماز آخار-باخارا باخیردی. ده‌نیز هر آن بیر رنگه بویانیردی و بو آن بیر انسان، ده‌نیزده اوزاق اوفوقلره، گونشه ساری اوزوردو.گنج اوغلان بیر ده‌نیزه، بیر گونشه و بیرده او انسانا باخیردی و اوره یی بو جانلی آخار-باخاردان برک دؤیونوردو. بیر گون او دا ...!
***
یولدا آوتوبوس یام یاشیل مئشه‌نین ایچیندن گئچیردی و او حئیرتله مئشه‌نی سئیر ائدیردی. سو پریسی نین سؤزلری یادینا دوشوردو و او ایتگین عزیز دوستونون سؤزو کی سون گؤروشده اونا دئمیشدی: گئت ائوینیزه، آمما آغیللی اول. او اسکی آهنگ یولدا، اونون بوتون وجودوندا چالینیردی و اسکی خاطیره‌لری گؤزلرینین اؤنونده جانلاندیریردی.
داود اهری
11/5/78