بیر شعر پابلو نئرودا دان
اینگیلسجهدن: تقی تبریزلی
پابلو نئرودا دان بیر شعر
اینگیلیسجهدن: تقی تبریزلی
بوردا
آدانی چئورهمیش
بیر دنیز واردیر
داییما داشار
دئییر: هن
سونرا، یوخ
سونرا بیرداها: یوخ
دئییر: هن
توتقون
دنیزین پوسگورمهسینده
دئییر: یوخ
و یوخ، بیرداها
دینج دایانا بیلمز.
دیلی توتولور
منیم آدیم دنیز.
قایالاری سیللیلیر
باشا دوشمزسه اونلاری
باغیریر اونلارا،
و اونلاری ایسلادیر
و اونلاری اؤپوجوکلهره چولقاییر
یئددی ایتین
یئددی یاشیل ببیرین
یئددی گؤی دنیزین
یئددی گؤی دیللهریاینن
آی دنیز،
بو سنین آدین.
آی یولداش اوقیانوس
زامانی ایتیرمه
آی سولار
بئله کدرلنمک یئرینه
بیزه یاردیمچی اول.
بیزلر قارا بالیخچیلاریخ،
قییی کیشیلری
آچ و اوشونج
و سنسن بیزیم دوشمانیمیز.
بئله یامان چیرپما
بئله یامان باغیرما،
گؤی صاندیغیوی آچ
گوموشدن توحفهلر قوی بیز اووجوموزا
بوگون بیزه
گوندهلیک بالیغیمیزی وئر.