.

.

 

 

 

 

  قاراباسما  

  نسرین شیرمحمدزاده

 

نسرین شیر محمد زاده

 

قاراباسما

 

نبی کسدی قوربانین باشینی. قویدو بیر توربا ایچینه. قوربانین گؤزلری بره­لنمیشدی.

مریم: - قورخوبدور،- دئیه، آزجا فیکیرلشدی. اؤزونو اونون یئرینه قویدو.- آتام اونا بیر گیله سو دا وئرمه­دی، من ده اولسایدیم قورخاردیم. مخصوصن ده ، بیچاغین کوت اولماسیندان. ایکی دفه دال­بادال چکندن سونرا  دا باش بدندن قوپموردو. من اولسایدیم، چوخدان اودوم چاتلامیشدی. بلکه اونون دا اودو چاتلاییبدیر. اؤیله اولسا یاخشی­ اولاردی، چونکی گؤرمزدی، آتام اللری­ایله قالانینی بیر- بیریندن آییردی.

نبی قوربانین باشینی بیر اوولانمیش سئرچه باشی کیمی اوزدو. ساکین احوالی وار ایدی. سانکی هئچ بیر شئی اولمامیشدی. یئره، دووارا، اطرافا، حتتا اوزونه سپه­له­نن قان دا اونو سارسیتمامیشدی. توربانی زئرزمی­نین دیب بوجاغیندان تاپدی. آغزینی باغلامایا چالیشدی. ایپ تاپابیلمه­یینجه، توربانین آغزینی اللری ایله بیر یئره ییغیب، گلین باشی­نین توری کیمین چوخلو چین وئریب، اوْوجونون ایچینده کیپ-کیپ توتدو و یولا دوشدو.

 

آتامین بو ایشینی آنلایا بیلمه­دیم. نئجه کی، آنامین گئجه یاریسی کیچیک فاضیلی بیر ات تیکه­سی کیمی چیینی­نه آتیب، های- کوی ایله، قیشقیرا- قیشقیرا و دهشت دولو گؤزلرله، آغلایا- آغلایا ائودن قاچماغینی. نه­دن منی اؤزوینن آپارمادی؟ هارایا گئتدی؟

 

نبی­نین آددیملاری آغیر ایدی. ائله بیل دونیانین بوتون آغیر داشلارینی اونون قیچلارینا باغلامیشدیلار. فیکره دالمیشدی. اَن باشیندان آخشام ائوه گلدیییندن بری، ائله­دیک­لرینی بیر فیلیم کیمی گؤزدن کئچیرمه­یه باشلامیشدی. آمما نه­دن­سه فیلمی، قیریق-قیریق ایدی. بو ایتیفاقا بیر موقصییر آختاریردی. کیمین چوخ گوناهی وار بو آرادا بیلمیردی، اؤزومو، همن­می، مریم­می، یا...

اؤزونه چوخلو حاقلار وئریردی. من کیشی­یم، بونلار آللاهین امری­دیر، آللاه دئییب­کی، یاخشی ایش گؤرون، جهاد ائله­یین. منده اونون یولوندا بو ایش­لری گؤرورم. عاییله­می جهننم اوودوندان قوروماق منیم وظیفه­م­دیر. چونکی اونلارین صاحیبی­یم. همن گره­ک مندن ایطاعت ائله­یه­یدی.همنین گوناهی مندن چوخدور، سؤزومه قولاغ آسسایدی، بوجور اولمازدی.

همن:- دیلییین دیشله کیشی،- دئدی،- صاباح بیر قریش یئرده یاتاجاقسان. بیر ده او جواب وئرن گونویه­ن فیکیرلش، سونرا آغزییین هاوایا آچ، هاداران- پاداران دانیش.

نبی مانقالی­نین اودونو پوفله­یه­-پوفله­یه:- دیل چیخارتمیسان!- دئدی،- بو سؤزلری او قارداشین سنه اؤیره­دیر دئییل­می؟

همنین گؤزلری یاشلا دولدو:- ال چک بو ایش­لریننن کیشی،- دئدی،- او هله کیچیک بیر اوشاق­دیر. باشا سالما بیله­سینی. آییندیرما، بو سؤزلر اونونچون چوخ تئزدیر. نئچه ایلدیر یولدان کئچه­نی، باققالدان توتدو چاققالاجان. قاپی-باجا دا کی، فامیل­ده­کی، کیشی­لری منه تیکه توتوبسان، بابالیمی یویوبسان دینمه­میشم. سوسموشام، آمما بونا دؤزه­ بیلمه­رم آرتیق. او بیریسی ده کی دئییرسن؛ منیم قارداشیم­دیر. بونو آنلامالیسان! منیم اوندان سونرا هئچ کسیم یوخدور.

 

آتامین آیاغی آسفالتین چوخورلاری­نین ایچینه گیردی و دیزی اوستونده یئره ییخیلدی. چتین­لیک­له یئردن قالخدی. دیزلری اینجیمیشدی، قیرمیزی بیر شئی شالواری­نین آلتیندان بیر دیزیندن آخمایا باشلامیشدی، آمما، سایمادی، یولونو داوام ائتدی. توربانین ایچینده کی، اتین قانی داملا-داملا آسفالتین اوستونده اه­یری-بویرو بیر خطط سالمیشدی. گئجه­نین یاریسی اولدوغونا گؤره هئچ گؤرونموردو. سانکی آتام نره­یه گئتدینی اؤزو ده بیلمیردی. هر یئره­ سس­سیزلیک چؤکموشدو. ساده­جه دریانین سسی گلیردی.

 

همن آغلاییردی. قویوب گئده­جه­یم آرتیق،- دئییردی،- آمما اؤزو ده یاخشی بیلیردی کی، هئچ بیر یئره گئده بیلمز. یعنی قویوب گئتمه­یه یئری یوخویدو. بو شهر ده اولدوغونا گؤره بو موصیبت­دن قورتولمانین همیشه ایکی یولو واردی و او هر ایکیسیندن ده قورخوردو. همن بورنونون سویونو چکه-چکه داوام ائتدی:- داها جانا دویموشام. ایشله­میرسن، ائوین خرجینی وئرمیرسن. کیشی­لر کیمی گمی­له سویا گئتمیرسن. هئچ اولمازسا بیر نئچه بالیق کی آخشامدان-آخشاما اؤزونله ائوه گتیره بیلردین. آمما اونو دا ائله­میرسن. سن کی ائو-ائشیک بیلمیردین نه­­دیر. نه­دن اوچ اوشاغی منیم باشیما قویدون؟

نبی بیر تپیک یاغ شورباسی­نین قابلاماسینا ووروب، یاغسیز، یئرالماسیز شوربانی یئرله- یئکسان ائله­دی: - منه،­ نه! دوغمویایدین اوچ اوشاغی،- دئدی.

همن یاواشجا:- ده­دم ائویندن کی، گتیرمه­میشم. سنین ائوینده دوغموشام. کئفه باخان زامان، بو گونلرین ده فیکرینی ائله­یه­یدین، نه ایندی کی، مانقال باشیندان قالخیبسان.

 

آتاملا- آنامین سؤزلریندن هئچ باش قورتارا بیلمیردیم. کیچیک فاضیل قورخموشدو و بیر قلمه آغلاییردی. اونو باغریما باسیب اوتاغین کونجونده تئلئویزیون ماساسی­نین آرخاسینا گیردیم. بوتون بو صحنه­لری ماسانین دالیندا اولان بیر ده­لیک­دن گؤروردوم و قورخوردوم. همیشه بو داوالاردا اؤز قورخولاریمی گیزلتمه­لی­ ایدیم. داوادان سونرا کی سس­سیزلیکده آنام همیشه:- چیخین سنگرینیزدن ائشییه،- دئییه­ردی،- هله­لیک صولح برقراردیر.

 

مریم ماسانین دالیندا تئز- تئز دیرناقلارینی چئینه­ییردی­ و او های- کویون ایچینده تک بیر آرزوسو وارایدی، بو داوا تئز قورتولسون. تامام فیکیری آخشام­چاغی دایی­سی­نین اونا آلدیغی دفتر- میدادین یانیندا قالمیشدی. دفتر- میدادینی اوشلاقلارا گؤسترمک ایسته­ییردی. «اونلارا بیر آزاجیق یاندی- قیندی وئره­جه­یم. چوخدا یوخ! گوناهدیلار. اوره­کلری یانار، ساده­جه بیر آزاجیق، ایینه اوجوجان. مدرسه­ده هر کس بئله شئی­لره راحاتلیقلا صاحاب اولا بیلمیر. » مریم بو فیکیردن گؤلومسوندو و اوره­یینده «چوخ شوکور آللاه»،- دئییب،- بیر آن ساواشین اورتاسیندا اولدوغونو اونوتدو.

 

نبی توپ گولـله­سی کیمی یئردن قالخدی و همنی دؤیمه­یه باشلادی. سیله، تپیک ایدی کی باش- گؤزونه یاغیردی. همنین سسی چیخمیردی. ساده­جه یاواش-یاواش آغلاییردی. کیچیک فاضیل قیشقیردی. مریمین الی­نین آلتیندان قاچماق ایسته­ییردی. سانکی همنی قورتارمایا چالیشیردی. مریم، قوللاریندا اولان گوجله اونو مؤحکم  توتدو. سسی چیخماسین دئییه،- بیر الینی ده آغزینا قویدو. بیلیردی کی، آرادا اولسالار اونلاردا ضربه یئییه­جک­لر.

همن همیشه ایکی مسله­یه چوخ تأکید ائدیردی:-بیر آتانیز منی دؤیه­نده آرایا گیرمه­یین، قورخورام سیزه بیر شئی اولا. ایکی، سسیمیزی قاپی- قونشو ائشیتمه­سین. قویون آبیریمیز اؤرتولو قالسین،- دئییه­ردی،- قاپی- قونشو نییه بیلسین! بیلسه­لر بئشینده اوستونه قویوب دونیایا یایارلار.

 مریم یوخو گؤروردو­مو، یوخسا، قاراباسیردی اونو، بیله­نمه­دی. همن هر گئجه یاتمامیشدان قاباق اونا، برک- برک تاپیشیراردی:- قیزیم دیققت ائله باشینیزین اوستونده قارا بیر شئی اولماسین، قاراباسار بیله­ییزی.

گئجه یاتمامیشدان قاباق کیچیک فاضیله ناغیل دئییردیی. کیتاب اوخوما بیلمیردی. تزه- تزه اؤیره­نیردی. مدرسه­ ده «بابا نان داد.» 1 ، «سارا انار دارد.» 2 ، «آن مرد داس دارد» 3، «مادر در باران آمد.»ی  4 و...  تزه اوخوموشدولار. ننه­سیندن ائشیتدییی بیر  

ناغیلی یاری دوز- یاری ترسینه فاضیله تعریف ائدیردی. کیچیک فاضیل چوخ تئز یوخلادی. مریم­­سه ذؤوق­دان یاتا بیلمیردی. میداد- دفترین فیکری اونو راحات بوراخمیردی. «داها صاباح­دان کؤثرین کؤهنه، یاری یازیلی دفترینده مشق­لریمی یازمایاجاغام»، دئییه یاتا بیلمیردی. آمما یوخو اونو اوزویله آپاردی.

یوخودا آتاسی اونا بیر گیزلین سؤز سؤیله­ییردی. نه­دن­سه چوخ مئهریبان اولموشدو. اونا یاواشجا:- سس سالما، هئچ­کیم بیلمه­دن سنی ماشینلا بیر یئره آپارجاغام دئییردی. آمما مریم قورخوردو، آناسینا دئمک ایسته­ییردی، نه­قدر چالیشیردی، یئنه ده سؤزونو دئیه بیلمیردی. بوغازیندان سس چیخمیردی.

 

آتام بیر تاکسی­بارا ال ائله­دی. سوروجو  یوخولو ایدی. آتامین غئیری-عادی اولماسینی باش تاپمادی: - هارایا؟- دئیه سوروشدو.

آتام مات- مات:- هارایا گئدیرسن،- دئدی.- شوفئر تعججوبله آتامین اوزونه باخدی.

-نه یعنی!، سن هارایا گئدیرسن؟

آتام اؤزونه گلدی و بیر آدرئس وئردی.  شوفئر تعججوبله آتامین اوزونه باخدی. آمما دینمه­دی. آیاغینی گازین اوستونه باسدی. بیردن آنلادیم ننه­م­گیلین ائولری­نین آدرئسی­دیر. بؤیوک باجیم کؤثر همیشه اورادا قالاردی. آخی ننه­م، نئچه ایللرایدی کی خسته­ایدی. تعججوبوم او زامان آرتدی کی، آتام، ننه­م­گیله گئتمه­یه تاکسی­یا مییندی. همیشه اورایا یئرده یویورورکن گئدردیک. بیزه چوخ یاخین ایدی.

 

تورباداکی اتین قانی تاکسی­بارین صندلی­نین اوستونده ده ایز بوراخدی.

نبی  دؤرد آی بوندان قاباق  زیندان­دان چیخمیشدی. مریم، آتاسی­نین زیندانا دوشدویونو، آناسی­لا، عمه­سی دانیشارکن ائشیتمیشدی.

همن:- مواد توتوبلار بیله­سیندن،- دئمیشدی،- یئددی آی یاتاجاق اورادا. اینشاللاه گئدر- گلمزه گئدر. هئچ دونمز.

عمه­سی:- دیلین دیشله، آرواد،- دئمیشدی.-  نه ده  اوسا، او منیم قارداشیم­دیر.

نبی یئددی آی سونرا ائوه دؤندو. مریم اوچون اوزون سوردو گلمه­سی. همن، نبی­نین دؤنمه­سیندن  ناراحات ایدی. اؤز- اؤزونه:- نه­تئز باشا گلدی بو یئددی آی،- دئییردی. نبی دؤندویو گوندن یئنه ده سؤزلر، داوالار باشلانمیشدی. زینداندان قایداندان سونرا تزه باهانالار تاپمیشدی، تزه سؤزلر اؤیره­نمیشدی. همن تعججوب ائله­ییردی. اونو آنلایا بیلمیردی. اونلارین یاشادیغی اؤلکه­ده بوشانماق دب دئییلدی. همنی هئچکس نبی­دن آیریلاندان سونرا ساخلامازدی، قارداشی بئله. اورادا قادینلار، بو موصییبت­دن قورتولماق اوچون اؤزلرینی یاندیریب، اودلایاردیلار. بو بیر دبه دونوشموشدو. همن یا گرک اؤزونو او بیری­لر کیمین اودلایاردی، یا گرک اوتوروب چکردی. او بونلاری بیلیردی و آبریسینا قیسینیردی. نبی­نین اونون اوستونه آد قویوب، سونرا راحاتچلیقلا اونو اؤلدورمه­سیندن ده قورخوردو. بو دا ایکیجی دب ایدی بو اؤلکه­ده. او بو اؤلکه­ده اوشاقلاری­نین ­صاحاب­سیز قالماسیندان دا قورخوردو.

نبی، زینداندان چیخاندان سونرا همنین قارداشی عبدوللایا ایلیشمیشدی. همنه:- نییه گلدی قارداشین بو ائوه؟ ،- دئییردی،- نییه گئتدی؟ سنه نه ائله­دی قارداشین؟ نه دن الیندن توتدو؟ نییه مریم ایله دانیشیر؟ نییه مریمی قوجاغینا آلیر؟ و....

او آخشام نبی ائوه دونمه­میشدن قاباق داییی­سی عبدوللا یئنه همنه باش چکمه­یه گلمیشدی. مریمه ده بیر دفتر و بیر میداد آلمیشدی. مریم سئوینجیندن بولودلاردا  اوچوردو.

عبدوللا ائولی دئییلدی، یاشی بیر آز کئچدییندن دالیجا دئدی-قودو دا وار ایدی.

 

تاکسی ساخلادی. آتام بولانا - بولانا یئره دوشدو. سونرا ننه­م گیلین کؤچه­لرینه گیردی. قاپلاری­نین دالیندا بیر آز دایاندی. قان داملالاری تاکسی­باردان دوشندن بری ، ننه­م گیلین قاپی­لارینین دالینا کیمین چکیلمیشدی. هر کس یاتمیشدی. آتام قاپی دالیندا بیر-بیرینین اوستونه ییغیلان، اودون و داش قالاغی­نین اوستونده اوتوردو. بئینی­نین ایچی قاریشمیشدی، هئچ تصمیم توتا بیلمیردی، الینده کی توربا اونو گیجه­لتمیشدی.

 

یوخو گؤروردو­مو، یوخسا قاراباسیردی مریمی، بیلمیردی. بیردن-بیره چینی­نین  اوستونده بیر شئی اولدوغونو حیسس ائتمه­یه باشلادی. قورخدو. گؤزلرینی آچدیغیندا نبی یانیندا اه­یله­شمیشدی. نبی، مریمین گؤزلری­نین آچیلدیغینی آنلادییی زامان الینی  اونون آغزی­نین اوستونه قویدو. یئردن دورماغینا بیر الی ایله کومک ائله­دی، و یولا دوشدو. مریم نه­دن­سه آتاسی­نین بیر الینده بیر شئی گیزلتدییی­نی حیسس ائله­دی،« نه­دیر بو؟»، « آتامین منیم­له نه ایشی وار؟»، « منه بیر شئی می آلیب­دیر، فاضیل بیلمه­سین دئییه بورادا وئره­جک­دیر؟ آمما نه دن گئجه یاریسی، بو ایشی گوندوز ده ائله­یه بیلردی!»، « یئنه آنامین باره­سینده منی سورغویا چکه­جکدی­می؟»، «آهان، بیلدییم! عبدوللاه داییم دان سوروشاجاق!، بو گون یئنه بورا گلیب­دیر دئییه سوال وئره­جک؟ سنه بیر شئی یاپدی­می دئییه­جک؟ همیشه سوروشدوغو سواللار! » و...  

نبی، مریمی زئرزمی­یه آپاردی. نه­دن­سه چوخ مئهریبان اولموشدو. آمما مریم بونو حیسس ائده ­­بیلمه­ییردی، چونکی قورخو دولو بیر ووجودا دؤنموشدو. آتاسی ایله اونلارین آراسیندا همیشه بیر فاصیله واریدی. مریم آتاسیندان همیشه قورخاردی. باخیشلاریندان، اوزون بویوندان، هئیکلی بدنیندن، یئکه و آغیر اللریندن. مریم جهد ائله­دی اؤزونه اوره­ک وئرسین:- نییه قورخورام،- دئدی،- هر نه اولسا او منیم آتام­دیر.

نبی، مریمین آغ بالیشی­نی دا اؤزویله گتیرمیشدی. بالیشی زئرزمی­ده یئره قویدو و اونا: - اوتور اوستونده دئدی. مریم اؤز- اؤزونه: «آنام بیر بیلسه بالیشی زئرزمی­نین توز-تورپاغینا سورتموسن، حتمن ائوده  بیر داوا دوشر،- دئدی».

 

آتام آیاغا قالخدی، توربانی هله ده الینده کیپ-کیپ توتموشدو. سانکی قورخوردو بیر آز بارماقلارینی بیر-بیریندن آچا و توربا آیاغ توتوب الیندن قاچا. یئنه یولا دوشدو. اونون هارایا گئتدییی­نی حدس وورا بیلمیردیم. کؤچه­نین بوروغونو چؤندو. اوزاقدان چوخلو ایشیق گؤرونوردو. آتام ایشیقلارا طرف یورومه­یه باشلادی.

 

نبی:- قیزیم سندن بیر سؤز سوروشاجاغام،- دئدی،- دوغرو جواب وئر. یاخشی ؟

مریم، باشییلا اونا یاخشی، دئدی.

- دایین بورا گلمیشدی دئییلمی؟

اونا بیر جاواب وئره بیلمه­دی. آناسی برک-برک تاپیشیرمیشدی، آتان بیلمه­سین. نه دئییه­جه­یی­نه قالمیشدیی. آتاسی ایکینجی سورونو سوروشدو:

- دایین بورایا گلنده سنی قوجاغینا آلارمی؟

- بلی، -دئدی.

- سنین اوز-گؤزوندن اؤپرمی؟

- بلی،- دئدی، و یئردن گؤیه اوچدو. نبی­نین تپییی دوز قارنیندان ده­یمیشدی.  بیر آز او طرف­­لیک یئره دوشدویونده، نبی باشی­نین اوستونده دورموشدو.

 

آتامین گؤزلری قان چاناغی کیمی اولموشدو، قیپ-قیرمیزی.

آیاقلاری یئرده سورونوردو. ایشیقلارا چوخ یاخینلاشمیشدی. اورا بیر ائوه بنزه­ییردی. بیری او ائوین قاپیسی قاباغیندا دورموشدو. آتام بیر آز اورایا قالان دایاندی. ائله بیل تصمیم توتا بیلمیردی کی، یاخینا گئتسین یوخسا قاییتسین.

نبی مریمین توکلریندن یاپیشدی، اونو یئردن قووزادی:- او سنه تجاووز ائتدی­می؟- دئییه، سوروشدو.

مریم حدقه­دن چیخمیش گؤزلرله نبی­نین اوزونه باخیردی. «تجاووز نه­دیر؟» بیلمیردی.«آتام مندن نه ایسته­ییر؟» دئییه اؤزوندن سوروشوردو. بئینینه فیشار گتیردی، «درس­لریمیزده تجاووز دئیه بیر شئی اوخودوق­مو؟، «خانیم موعللیم بو باره­ده بیزله دانیشیب­می؟»، «یوخ دانیشماییب، نه دئیم آتاما، بلی­می، یوخ­مو؟»

مریم یئنه اؤزونو هاوایلا یئر آراسیندا تاپدیغیندا سسی چیخماسین دئیه یئره دوشنده دوداقلارینی مؤحکم دیشلری­­نین آراسیندا سیخدی. سونرا آنی بیر جرقه بئینی­نین ایچینده چیراغ کیمی یانمایا باشلادی؟« بلی دئسه­م، بلکه منی وورمازدا، چوخ آغریر» یاواشجا آغزی­نین قانی­نی یئره توپوردو و زاریلادی. نبی بیر یئکه زوپا الینده اونا یاناشدی. مریمین قیچی بتر آغریردی. قیچی­نی هئچ ترپه­ده ­بیلمیردی. باشینی آستاجا قووزادی. اوز-گؤزو داغیلمیشدی. عاجیزجه­سینه نبی­نین اوزونه باخدی. نبی­یه سس­سیزجه یالواریردی سانکی.

نبی باشی اوستونده اوتوردو. غیظله مریمه :- ائتدی­می؟ ائتمه­دی­می؟ دئیه،- سوروشدو.

مریم آغلایا- آغلایا کیچیک الی ایله آغزی­نین قانی­نی سیلدی و بیر درین آه چکیب:- ائتدی،- دئدی.

 

آتام بیر موددت اورادا دایاناندان سونرا ایشیقلارا طرف یویوردو.  توربانین قانی هله یئرده ایز بوراخیردی. قاپی قاباغیندا دوران آدام بیر عسگر ایدی. چینی­نین اوستونده بیر توفنگ وار ایدی. آتامی گؤرمک همین:- دور! سن! کیمسن؟ نه ایسته­ییرسن؟- دئدی.

آتام هئچ دئمه­دی. ساده­جه الینده کی توربانی عسگرین گؤزو قاباغینا توتدو. توربانین اوستونده کی قان و قانین یئره توکولن داملالاری اونو سارسیتدی. عسگر ایختییارسیز بیر حالدا قیشقیردی: سرکار اوستووار!، سرکار اوستووار!

هر کس ایچری­دن ائشییه چیخدی. هامیسی تومموشدولار و ایستر- ایسته­مز فقط توربایا باخیردیلار. نبی اونلارین گؤزو قاباغیندا ایچری­یه یورویوب. توربانی اوتاقداکی ماسانین اوستونه قویدو. ماسانین اوستونو قان گؤتوردو. نبی ماسانین یانیندا یئره اوتوردو.

 

نبی مریمین ساچلاریندان یاپیشدی و بو دفه برک سسله چیغیردی:- نه دئدین؟ او حریف سنه تجاووز ائتدی، دئییل­می؟- مریم جاواب وئرمه فورصتی تاپمادی.

نبی مریمی یئرین اوستونده سوروتدویه- سوروتدویه بالیشا طرف چکدی. مریمین باشینی بالیشین اوستونه قویدو . اؤزوده مریمین اوستونده اوتوردو. مریم بو فیشاری تحممول ائله­یه بیلمیردی. چابالامایا باشلادی. داها چوخ قورخموشدو. چیغیرماق ایسته­دی، آمما نبی او یئکه ­الی­له آغزینی توتدو. او بیریسی الی ایله بیچاغی سؤرعتله مریمین بوغازینا چکدی. قان هر یئره فیشقیردی. بیرده چکدی و...

 

همن سسه دیسکیندی و دیک یئرینین ایچینده اوتوردو. اطرافا باخدی. بیردن مریمین یئرینی بوش گؤردو. فنر کیمی یئردن قالخیب او بیریسی اوتاغا نبی­نین یئرینه باخدی. نبی ده یوخ ایدی. اؤره­یی آغرینین ایچینده چالینمایا باشلادی. اطرافا یئنه باخدیغیندا، زئرزمی­نین یانیق چیراغی نظرینی جلب ائتدی. یئیین-یئیین پیلله­لره طرف قاچدی. بیر پیلله­نی گؤرمه­یینجه باشی اوستونده یئره چؤکدو. زئرزمی­نین قاپیسی قاباغیندا بیر آز دایاندی. یاواش-یاواش ایچری گیردی. مریم نبی­نین قاباغیندا اوزانمیشدی. آشپازخانانین آغ دسته یئکه بیچاغی  قانلی اولاراق یئرده ایدی. مریمی کامیل اولاراق گؤرموردو. نبی­نین نه ائله­دییی­نی ده. نبی­نین دالی اونا ایدی. همن بوغازیندا ییغیشان سویو زورلا اودغوندو و سسی چیخار- چیخماز  نبی­نی سسله­دی.  نبی یاواشجا دؤندو. همن بیردن نبی­نین نه­ ایش گؤردویونو گؤردو. نبی ایکی اللی مریمین  یاری­یا کیمین کسیلدیی بوغازینی بیر- بیریندن آییریردی. همن قیشقیردی. قیشقیردی، آغلادی. آغلادی و یوخاریا کیچیک فاضیله طرف قاچدی. سونرا....

عسگر ، سرکار اوستووارین امری­ایله توربانین آغزینی آچدی و گؤردویو منظره­دن چیلغینجا چیغیردی. اوتاقدا کی، هرکسین  آغزی آچیق قالمیشدی. رنگی سارالمیشدی. سانکی بیر شوک ایچینه گیرمیشدیلر. هر کس سوسموشدو. مریمین توکلری قاندان بیر-بیرینه گیرمیشدی. چؤلدن دریانین سسی گلیردی. دریا هو دئیه باغیریردی سانکی.

نبی اؤز-اؤزونه صبر ائله همن سنین­کین ده سنه وئره­جه­یم،- دئییردی. لاپ اؤز باشینا اولموسان. من سنی ایللردیر چؤله چیخماقدان منع ائله­میشم. سن گئجه یاریسی چؤله چیخیرسان. بیر قیچییین سیندیراندا اوندا بیلرسن کی، نبی­نین هئچ کسله ظارافاتی یوخدور. بو فیکیرلرله یئردن قالخدی و قاپی­یا طرف آددیملادی. قاپی­دا دوران عسگر گؤزلری­نین یاشینی سیله-سیله سیلاحی­نی اونا ساری توتدو:- اللرینیزی قالدیرین، سیزی توتمایا فرمانیمیز وار.

نبی تعججوب ائله­دی:- نه­دن،- دئییه، سوروشدو؟

اوستووار اونا نیفرت­له باخدی و جورملرینی سایدی.

نبی:- سیز منه هئچ بیر شئی ائله­یه بیلمز­سینیز.- دئدی.- من اوز حاق و حوقوقومو ازبرم، من ناموسومو، شرفیمی قوروموشام. بو آللاهین بویوروغودور؛ یاخشی ایش گؤرون، جیهاد ائله­یین، یاخشیلیغا چاغیرین. من ده جیهاد ائله­میشم. اگر منه بیر شئی ائله­سه­نیز، من آللاهین بویوردوغو یولدا شهید ساییلاجاغام. بونو ایسته­ییرسینیز سه منی توتون.

اوستووار آغلادی. ماسانین اوستونده­کی باشین  حدقه­دن چیخمیش گؤزلری­نین بیرینده ایکی داملا یاش دونموشدو.

                                                     17/8/87

 

 

اتک یازی:

1)  آتا چؤرک وئردی.

2)  سارانین ناری وار.

3)  او کیشی­نین اوراغی وار.

4) آنا یاغیشدا گلدی.