من، بالیق و دهنیز
داود اهری
آنام سو بانکاسینی الیمده گؤرجک اشاره ایله سوروشدو:
اونو هارایا آپاریرسان؟!
دئدیم:
داها یورولموشام. ایستهییرم آپارام دهنیزه بوراخام.
چانتالاری گؤتوردوک یولا دوشدوک. اؤز-اؤزومه دئییردیم ائلهیه بیلهجهیم بالیغی دیری دهنیزه چاتدیرام یا یوخ.
تیر آیی نین اورتالارینین ایستی گونلری ایدی. آوتوبوسدا سو بانکاسی الیمده ایدی و من قرمزی بالیغا گؤز دیکمیشدیم. سرابا قدهر اوزون یول قارشیمیزداایدی. بالیق ایستینین چوخلوغوندان باشینی سو اوزونه گتیرمیشدی و هئی آغزینی آچیب یوموردو. هر کس الیمده سو بانکاسینی و بالیغی گوروردو تعجّوب ائلهییردی.
دونن گئجه اوتاغیمدا بانکانی قارشیما قویموشدوم و قرمزی بالیقایلا دانیشیردیم. دئییردیم:-بیلیرسن، ایستهییرم سنی آپارام دهنیزه. دهنیزی سئویرسن؟ ایستهییرسن دهنیزی گؤرهسن؟ بیلیرسن دهنیز نهقدهر بؤیوکدور؟ و بالیق سانکی سؤزلریمه قولاق آسیردی.
بوتون تقصیرلر منیم بو باجی اوشاقلاریمدادیر. اینیشی ایل بایرامدا، کی ائویمیزه قرمزی بالیق گتیردیلر، هله بیر نئچه گون بایرامدان کئچمه میشدی بالیق اؤلدو و من کدرلندیم. بیلدیر ده گؤردوم کی بالیق الدن گئدیر، مجبور اولدوم شیخ شهاب پارکی نین گؤلونه یئتیرم و اورادا بوراخام. سو بانکاسینی سیندیرمیشدیم و بو قرارا گلمیشدیم کی اوشاقلارا دئیهم داها حقلری یوخدور بایرامدا قرمزی بالیق ائویمیزه گتیره لر و اگر گتیرسهلر گرهک بایرامدان سونرا اؤز ائولرینه آپارسینلار.
بو ایل بایرامدا تهرانداایدیم.ایکی اوچ گون بایرامدان قالمیش شه هه ریمیزه قاییتدیم و آچیق آغیز و گؤزلرایله گؤردوم کی اوشاقلار گئدیبلر و بیر سو بانکاسی بیر قرمزی بالیق ایلا ائویمیزده قالیبدیر.
مجبور اولدوم سویون ده ییشمه سینین و قوناغا خیردا چؤره ک وئرمک وظیفه سینی بوینوما آلام.بیزیم شه هه رین کی سویونون تعریفی یوخدور و اگر کلر وورسالار بالیق اؤلر.مجبور اولدوم بیر ایکی گوندن قاینانمیش سویو قویام سویوسون تا بانکانین سویونو ده ییشم. گئت به گئت قرمزی بالیق ایلا دوست اولدوم.سو بانکاسینی پیلله لرین دؤنومونده قویموشدوم چون اورا سرین راق ایدی.بالیق داها منی تانیمیشدی.پیلله لردن ائنیب قالخاندا دایانیردی ، قویروغونو و قلسه مه لرینی ترپه دیردی ، آغزینی آچیب-یوموب عجایب گؤزلری ایله منه باخیردی و یئمک ایسته ییردی.هردن بالیق ایلا اویناییردیم دا.بارماقلاریمی شوشه بانکانین قیرا قلارینا چکیردیم، او دا فیرلانیردی او اوز بو اوزه گئدیردی.هردن بارماغیمی سویا باسیردیم و بالیغین آرخاسینا سورترکن او قویروغونو و قلسه مه لرینی ترپه دیردی و سئوینجله دؤور ووروردو. هر گون قایغی سینداایدیم کی سویونو ده ییشمیشم ، یئمه یینی وئرمیشم یا یوخ.آمما بو ایش هاچانادک داوام تاپاجاق ایدی؟ نهایت اؤله جک ایدی و من کدر له نه جک ایدیم و مجبور قالاجاق ایدیم او ایلکی کیمی لئشینی زیبیل تورباسینا آتام.بالیغین یئری کی خیرداجا شوشه بانکاسی دئییل.بالیغین یئری ده نیزدیر، اگر قراردیر اؤله نه یاخشی کی ده نیزده ، آزادلیقدا اؤله.
نئچه گون کی سرابداایدیم یئنه اوندان موغایات ایدیم. آنام سرابدا قالدی . یولدا آوتوبوسدا ائله نگران ایدیم کی اگر بانکا الیمدن دوشه ، سینا و سویو جالانا ، نه ائتمه لی یم.اردبیلده بیر اداره ده دوستومون سوراغینا گئتدیم.بیر نفر بالیغی گؤرجک گوله – گوله دئدی:-بایرامیز مبارک! دئدیم:-سیزین ده بایرامیز مبارک . بایرام بالیغیدیر ، ایسته ییرم آپارام ده نیزی گؤرسون. اؤز-اؤزومه دئدیم حتما فیکیر ائله ییر عجب تورکی سایا آدام ایلا طرفدیر.سو بانکاسینی دوستومون ایش ماساسینین اوستونه قویجاق، دوستوم سؤز آتدی:- بو دا خیرداجا قرمزی بالیقدیر؟! دئدیم:- یوخ ، بو بیریسی ارکؤیون و ائو اوشاغیدیر ، بانکادا بویویوبدور.
بیر نفر دئدی:- بو بالیقلار قیسیردیلار. و بیر آیریسی دئدی کی شه هه رلرین بیرینده مسئوللار بیر یئری نظرده توتوبلار تا جماعات بایرام بالیقلارینی اورایا وئرسینلر . اورادا بالیقلارین تانینما نشانه لری واردیر و صاحیبلری هر زامان ایسته سه لر ائله یه بیلرلر گئتسینلر و اؤز بالیقلارینی گؤرسونلر. رادیودان دا ائشیتمیشدیم کی بو بالیقلاری گره ک چایلاردا اؤتورمه مک چون باعث اولارلار او بیری بالیقلارین حیات دولانیشلاری تهلکه یه دوشسون.
آستارا یولوندا بیر قوجا کیشی کناریمدا ایلشمیشدی. تعجّوبله سوروشدو:-بالیغی هارایا آپاریرسان؟! دئدیم:- بیلیرسیز بو بالیغی نه اوزاق یئردن اللریمده گتیرمیشم ؟ بایرامدان ایندییهدک موغایات اولموشام ،داها بویویوبدور و ایندی ایسته ییرم آپارام خزره بوراخام. دئدی:-آفرین سنه، آمما اونو بؤیوک بالیقلار یئیهرلر. دئدیم:- هر نه اولورسا اولسون. داها یورولموشام. میرزا نووروزون باشماقلارینین ماجراسی دیر. گولدی و باشینی ترپتدی. بیلمهییرم سؤزومو باشا دوشدو یا یوخ.
حیران گه دیگینده ماشینین سیلکینتی لری منی اوساندیرمیشدی .دوداق آلتی زمزمه ائله ییردیم :- ده نیزدن ایک ، ده نیزه گئدیریک ...! آستارایا یئتیشجک بیر مسافرخانادا اوتاق کرایه ائله دیم. چانتامی اورادا قویدوم. سو بانکاسینی گؤتوردوم تا اؤزومو ساحیله یئتیرم. یولدابیر خیرداجا اوغلان سوروشدو:-ایسته ییرسن ده نیزه بوراخاسان؟ دئدیم:-بلی. دئدی:-سویو شوردور ، اؤلر. دئدیم:- ده نیزده اؤلمه یی یاخشی دیر.
ساحیله یئتیشدیم.خزر گؤزه ل لیکله جلوه له نیردی.ساحیل خلوت ایدی.قرارسیز ده نیز قوشلاری اوچوردولار . او گون یادیما دوشدی کی کئچن ایل شیخ شهاب پارکی ده نیز قوشلاریندان دولو ایدی. قوملارین اوستونده اوتوردوم. سو بانکاسینی کناریمدا قویدوم و من و بالیق هر ایکیمیز ده نیزین دالغالارینا زیلله ندیک.
نفسیمی تزه لتدیم.نهایت بالیغی سالم و دیری ده نیزه یئتیرمیشدیم.بیر سیگارئت آلیشدیردیم و فیکره دالدیم. فیکریمدن کئچدی کی ایندی کی بالیق ده نیزی گؤروب ، اؤزوم ایله ائوه قایتاریم. آمما هله ایسته ییردیم رشته گئده م و بلکه اورادان دا تهرانا.اوزاق یول ائوه قاییتماغا وارایدی.
بیر ماشین گلدی ساحیلده دایاندی. ایکی گنج قیز دوشوب گلدیلر سو قیراغینا. بیری لباسی ایلا گیردی سویا.ساریشین قیزایدی.قددی نه آلچاق نه اوجا. گؤزه ل توکلری چارقادینین آلتیندان آلنینا دوشموشدی و یئل آهسته اونلارایلا اویناییردی.او بیریسی الینده بیر فوتو آپارات وارایدی و گؤزلرینه گؤزلوک تاخمیشدی. قیزلار تعجّوبله سو بانکاسینین قرمزی بالیغینا باخیردیلار.سیگارئتیمی آتدیم و الینده فوتو آپارات اولان قیزا دئدیم:-اولا بیلر دوستونوزا دئیه سینیز بو سو بانکاسینی اوزاقدا ده نیزین سویونا بوشالتسین ؟تعجّوبله دئدی:-ایسته ییرسینیز بالیغی ده نیزده بوراخاسینیز؟ تأسّوفله دئدیم:-بلی. دئدی:- حاییف دئییل؟ دئدیم :-بیلیرسینیز نه اوزاق یولدان بورایا قده ر گتیرمیشم؟ سوسدو.دوستونو چاغیردی.دوستو گلدی.سو بانکاسینی وئردیم الینه و دئدیم: خواهش ائلهییرم بیر آز اوزاقلیقدا بانکانی بوشالداسینیز. او دوستونا دئدی سو بانکاسینی بالیق ایلا بوشالتماق ایستهینده اوندان فوتو گؤتورسون.
بیر آز دهنیزین سویوندا گئتدی قاباغا. سو بئلینهدک یئتیشمیشدی کی دایاندی. سو بانکاسینی ایکی الی ایله قوجاغینا باسمیشدی. بیر منه باخدی، اییلدی و آرام –آرام سو بانکاسینی بالیق ایلا ده نیزین سویونا بوشالتدی. دوستو اوندان بیر ایکی فوتو گؤتوردو. او قاییتدی. بئلینه قدهر ایسلانمیشدی. بوش سو بانکاسینی وئردی الیمه. تشکر ائلهدیم. کدرلیایدیم. دوستونا اوز توتوب دئدیم:-نهایت بالیغین ائوی ده نیزدیر و هر چند کی بو ایشه راضی دئییلدیم آمما مجبور ایدیم و ایندی ده کدرلی یم.
وداعلاشیب اونلاردان آیریلدیم. بوش سو بانکاسی الیمده ایدی. دهنیزه باخدیم. دالغالار آرامجاسینا یولدان یئتیشیردیلر. قورخوردوم بالیق دهنیزین سویونون شورلوغوندان اؤله و دالغالار لئشینی ساحیله گتیرهلر و یا شاید بیر آیری بالیق اونو اودموش اولا. تشویش ایله ساحیلدن اوزاقلاشدیم. شهههره گلدیم. بوش سو بانکاسینی زیبیل لرین کناریندا قویدوم و مسافرخانایا ساری یولا دوشدوم. ایشیم سونا چاتمیشدی. یونگوللوک حسّ ائدیردیم و عین زاماندا غملی ایدیم.
بو دا بو ایلدن. آمما اوشاقلارین اگر جرأتلری واردیر یئنهده بایرامدا ائویمیزه قرمزی بالیق گتیرسینلر. یوخ داها ائویمیزه قویمارام، من کی میرزا نوروز دئییلم.
گئجه یالنیز ساحیلده اوتورموشدوم.عجب تاماشالی دیر اون دؤرد گئجه لیک آیی ده نیزین اوستونده گؤرمک. آمما حاییف. گؤی بولوتلوایدی. آیدان بیر خبر اولمادی. قرمزی بالیق هاراداایدی ؟
بیر آز اوزاقلیقدا، ساحیلین بویوندا، چراغلارین ایشیغیندا، دهنیزین عنادلی دالغالاری، قویروقلو اولدوزلار کیمی اؤزلرینی دینجلیک ساحیلینه یئتیریردیلر...!
داود اهری
اهر – 5/6/80