.

.

 

 

 

 

  هئرمئنوتیک 

  ناصر مرقاتی

 

 ناصر مرقاتی 

 

  • هئرمئنوتیک

 

 

هرزامان بوآلمان پوستونون نیشانین گؤرورم، بیلمیرم نه دن (هئرمئس) دوشور یادیما. هئچ بیلمیرم اونوندا الینده بئله بیر شئیپور واریمیش یوخسا یوخ؟ اولوب اولماماسی اؤنملی دئییل. سؤز بوردادیر کی، شئیپورلا هئرمئسین یاخین بیر ایلگیسی وار.

هئرمئس ائشیدیب گلیر.

ـ آه هئرمئس، هئرمئس نه دن بؤیله قوجالدین سن؟!

هئرمئس گیلئی لی:

ـ یوخ، یوخ قوجالمامیشام هله.

دوغورداندا یامان قوجالمیشدی او. تانریلارین ( اولـمپ )دن گؤندردیکلری، عشق نامه لری ، قورخونج حربه ـ زوربالاری، اؤیود ونصیحتلی سؤزلری و گیزلین ـ پاچ توطئه کارلیقلارینین مکتوبلاری، اونو آیاقدان سالمیشدی. هله مکتوبلار اؤز یئرینده قالسین، مکتوبدا یازیلمیش سؤزلری؛ تانری سؤزو عنوانیندا، آچیب ـ آغارتما، یوروب و یوزما دا ائله کیچیک بیرایش دئییلدی.

اونون سارساققالی درماندا آغارمامیشدی. او مکتوبلارین طمطراقلی سؤزلرین، یئکه ـ یئکه، بؤیوش وئرمک لرین، ان درین، ان گیزلی ایچ سؤزلرین فانی بشره چاتدیریب واونلار اوچون خیردالی ییب معنا ائدیردی. آنجاق بو سون زامانلاردا، مکتوبلار گئدیب چاتمیردی. خبرلر داها دئییلمیردی. تانریلارین سؤزو و بویوروقلاری، یوروب ـ یوزولموردی. دئمک ایت یییه سین تانیمیردی. هـرکی ـ هـرکیلیک هـریانی بوروموشدو. عالمین پوستی قاریشمیشدی.

         تانری لار ایله شیب چوخ دانیشیب ـ دارتیشمادان سورا بئله قراره گـلدیلر کی: هئرمئنوتیکی، الدن دوشموش هئرمئسدن آلیب و ( روح القودوس ) جنابینا وئرسینلر. وبئله لیکله هئرمئنوتیک اولمپ داغیندان، گؤیلره قالخدی. 

    

                                               آوریل 2003  پوتسدام