X
تبلیغات
رایتل

 

 

  هیچستان مسافری 

  داود اهری

 

 

داود اهری

  • هیچستان مسافری

     

  قیسسا پیام زنگیندن یوخودان آییلدیم. چراغی یاندیردیم.پیام بو ایدی:آختارمیشام یوخ ایدی.سن داها آختارما، یوخدور.

         ائشیکده خیاواندا یاغیشین سسی گلیردی.دوواردا آسیلان تابلویا باخدیم.قوجا کیشی ساحلده ائله اوتورموشدی و آی ایشیغیندا، سیگارئت بارماقلارینین آراسیندا ده‌نیزه گؤز دیکمیشدی. شعریمین باشلانیشی ذهنیمده عکس صدا تاپدی: فنا ده‌نیزی‌نین ساحلینده من هاچانا قدر؟

         چوخدان ایدی کی یاغیش یاغمامیشدی و بو یاز یاغیشی دامین شیروانیسیندا بیر آهنگ چالیردی کی روحومو نوازش ائله ییردی.یورقان دؤشه گیمی ساهمانلادیم  و باشلادیم یوگا ورزشی ائتمه یه.باشقا بیر آهنگه احتیاجیم یوخ ایدی.یاغیشین سسی ان گؤزه ل موسیقی ایدی.سونرا او قاچاغان دینجلیک سوراغیما گلدی. چراغی سؤندوردوم و یئریمده اوزاندیم. یاغیش ائله یاغیردی. سونرا قوجا کیشی گؤزلریمین اؤنونده جانلاندی. بؤرکی، پالتووی، کت شالواری و الینده کی عصا ایله. آریق، اورتا بوی، چئری گؤزلری ایله کی بیلمه ییردین سنه باخیر یا آیری بیر یئره.

         بیر قه‌فه‌ده  کی معمولاً آخشام چاغلاری اورایا چای ایچمه‌یه گئده‌رم چوخ واخت اونو گؤره‌رم. دینج اوتوروب، عصا قیچلارینین آراسیندا، سیگارئت دوداغیندا و بیر استکان چای ایچیر. کیمسه ایله دانیشماز. یاواش گلیر و یاواش گئدیر.  شهرده اونو بیر یئرده گؤرمه‌میشم. بیر ایکی دفعه دارایی اداره سینین قارشی‌سیندا اونو گؤرموشم کی دووارا سؤیکه نیب و سیگارئت چکیر. یئتمیش هشتاد یاشی اولار آمما ساغلامدی. ایلک دؤنه کی اونو گؤردوم اؤز-اؤزومه دئدیم: هیچستان مسافری. نییه اونو بو آد ایلا آدلادیم. مگر یاشادیر؟ بیز هامی‌میز مسافرایک. هئچ کیمسه‌نین خبری یوخدور، آمما هیچستان او یئرین آدی ایدی کی او انتحار گئجه سینده او باره ده یازیب قویموشدوم...

         بیر ایکی دفعه یاخینلیغیمدا اوتوروب. چالیشمیشام اونونلا دانیشام آمما سونرا پئشمان اولموشام. نه باره‌ده گره‌ک اونونلا دانیشام. او کی اصلاً خیالی یوخدور بیری ایله دانیشا. اؤز دنیاسیندا دینج و آسوده دیر. بیر یونگول کؤلگه کیمی گلیر گئدیر. الینده یوخدور داشی او، کیمسه ایله یوخدور ساواشی او، قیسناماییر کیمسه نی او، سرخوشدور گلستان کیمی.

         آخ. یاغیش. بو یاغیش قارا دوشونجه لریمی یویور. او سونوجسوز انتحاریمدان سونرا یئنیدن دوغولدوم. داها هیچستانا گئتمه‌یه عجله‌م یوخدور. آمما یوخو منی اورایا یاخینلادیر. یاتماغا غریبه گؤیلوم واردی. فکر ائله ییرم یوخودا یالنیز بیر آددیم اورایا قالیر. یوخو اؤلومون باجیسی دیر. گئتمکدن هئچ بیر قورخو یوخومدور. او شئی کی فکریمی قاتیر گله‌جه‌یین فکری بو گونده‌لیک یاشاییشدادیر و چتینلیک‌لر و خسته لیک‌لر دیر کی سوراغیما گله جکدیر و منی درده و کدره مبتلا ائده‌جکدیر. آمما اؤزومی راضی ائله‌میشم. بو یاشاییش بودور کی وار. بوتون دلخوشلوق و کدرلری ایله. یاغیش نه گؤزه‌ل یاغیر. گئت به گئت یوخو گؤزلریمی آلیر...

                                                          ***

         ناهاردان سونرا پارکا گئدیرم. منیم پیادا آددیملادیغیم یئر خلوتدیر. آشاغی-یوخاری گئدیرم. دونن گئجه کی دوشونجه لریمی یادیما سالیرام. قوجا کیشی یادیما دوشور. یوخ! او یالنیز سوژه دئییل. بیز هئچ بیریمیز یازماغا سوژه دئییلیک. بلکه هامی میز سوژه‌ایک. من گره‌کمز اونون ایچری دینجلیگین بیر بیرینه وورام. اونون دا منیمله بیر ایشی یوخدور. بیز شهریمیزده و اؤلکه میزده غریب‌ایک. بیز بو دنیادا غریب‌ایک.  هیچستاندان کیمسه قاییتماییر کی اؤزو ایله بیزه بیر پیام گتیرسین و اورادا بیر کس یوخدور کی بیز اونا بیر پیام یوللایاق. هر نه وار بورادادیر. دوستوما دونن گئجه کی قیسسا پیامین جوابینی گؤنده‌ریرم: اگر یورولوبسان قال و اگر ایسته سن بیل، بیزیم بوتون حیاتدان لذتیمیز آختاریشدادیر. آختارماق بوتون یاشاییشین معناسی دیر. هئچ زامان آختارما، یوخدور، کیشی یه یاراشان دئییل. (1)

         گره‌ک پارکی ترک ائله یم. بیر آزدان سونرا قارقالار پارکین خلوتین اؤز قاریلتی‌لاریلا بیر بیرینه ووراجاقلار. اونلار گلنده من گره‌ک کی گئده‌م.

                                                          ***

         آخشام چاغی قه‌فه‌ده اوتورموشدوم. قه‌فه‌چی‌نین حساب میزینین اوستونده داوودی گوللر قویموشدولار. ائله ایلک چاییمی ایچمیشدیم کی هیچستان مسافری گلدی و سس سیز یانیمدا اوتوردو و بیر سیگارئت آلیشدیردی. من‌ده بیر سیگارئت آلیشدیردیم. سیگارئت لریمیزین توستوسی ائله‌بیل هیچستاندا بیر بیرینه قوووشوردی آمما بیز هله دیری‌ایدیک. نه قدر لذٌتلی‌دیر چای ایچمک.

         بیر ژاپنی هایکو یادیما دوشدی: هئچ بیری دانیشمادی، نه ائو صاحبی، نه قوناق و نه ده داوودی گوللر...

         قالخدیم و قه‌فه‌نی ترک ائله‌دیم.

                                                                                       اهر- 19/1/88

(1) گئجه گلن قیسسا پیام و اونون جوابی اصلینده بؤیوک شاعر، فریدون مشیری‌نین بیر شعرینین بیر بؤلوموندندیر.