X
تبلیغات
رایتل

 دوشونجه لر 

  2- ابدییت 

  داود اهری

 

  • ایکینجی بؤلوم: ابدیت
  • داود اهری

 

 

یئنه ده خزرین خلوت ساحیلی، اوزاقلاردا یئنه ده اوفوق. بارماغیم ایلا ایسلانمیش قوملاردا یازیرام:سونسوزلوق. ده نیزین آرام دالغالاری یازدیغیمی گئت به گئت سیلیرلر.

بئینیمه بیر سیرا فیکیرلر یورویور:

بؤیوک دونیانین کیچیک دونیالارینین سونسوز پلانئت لرینده حیاتیمین چئشیدلی لحظه لرین و دؤره لرین کئچیردیرم. بیریسینده سود امر اوشاغام، باشقاسیندا ابتدائی مکتبه گئدیرم. بیریسینده راهنمایی مکتبینه، آیری سیندا اورتا مکتبه، بیریسینده عسگرلیک دؤره سینده یم، باشقاسیندا کئچمیش یوگوسلاوی یادا اونیوئرسیته یه گئدیرم. بیریسینده ایراندا چالیشیرام و آیری سیندا ادبی- هنری ایشلرله باشیمی قاتمیشام. بو دؤره لرین هر بیر لحظه سینی بیر سیرا پلانئت لرده حتی تکرارا کئچیردیرم و ائله بو لحظه لری بیریسیندن سونرا او بیریسینده و دوغوم، حیات، اؤلوم و دوغوم، حیات، اؤلوم و یئنه ... کئچیردیرم کی هر بیر لحظه ده وارام وداها منه کئچمیش، حال و گله جک زامان و مکانین سونسوزلوغوندا نه معناسی اولا بیلر؟

آیا هر بیر موجودون روح و جسم ابدی لیک سیرری، بؤیوک دونیادا همن بو زامانین و مکانین سونسوزلوغوندا دئییل؟ پس اؤلومون بیر لحظه کئچیش و باشلانیش‌‌ و یئنه حیاتی تجربه ائله مکدن باشقا نه معناسی اولا بیلر؟باشقا طرفدن آیا بو دوشونجه لر منی بیر سونسوز طبیعی جبرین تکرارینین قبول ائتمه سینه مجبور ائله مه ییر؟ پس اودوزماق و اودماق، آغلاماق و گولمک، خوشلوق و ناخوشلوغو هانسی بیر انسانی اراده موجب اولور؟ آیا بوتون حیات، تکامل، مدنیت و کولتور پروسئسی و بوتون اولایلار و اونلارین آرادان گئتمه سی یئر آدیندا بیر پلانئتده و اونلارین سونسوز دفعه لر تکراری، بؤ یوک دونیانین سونسوز پلانئت لرینده دالبادال و همیشه تکرار اولونان و اوز وئرهن بیر سناریو کیمی دئییل؟ و آلین یازیسی...؟ داها اوندان قاچماق ممکن دئییل؟!

الیمده کیقرمزی آلمانی دیشله ییرم.بارماغیم ایلا یئنه ساحیلین ایسلانمیش قوملاریندا یازیرام: سونسوزلوق

قاییدیرام. آرخامدا اوفوق، ده نیز، گؤی و دالغالارین موسیقی سسی کی یازدیغیمی گئت به گئت پوزورلار.

گئجه، ده نیزین یوخوسو پریشاندیر. آمما من یالنیز اوتاغیمدا تختین اوستونده اوزانیب و شیرین یوخویا گئتمیشم. یوخودا گؤرورم سنین آدینی ایسلانمیش قوملاردا یازیرام و سن ای ده نیز پریسی، اوزاقلاردان، ده نیزدن گلیرسن بیر ماوی گئییمده. سنی سسله ییرم:

         - گل! سنه آلما گتیرمیشم، بیر سبد قرمزی آلما ...!

تلفونون زنگ چالما سسی منی اویادیر.یوخولو دستکی گؤتورورم :

         - الو، بویورون...!

و بیر سوره کلی سوکوت. تلفون خطینین او بیری باشیندا کیمدیر، نییه دانیشماییر؟ یاخشی تانیییرام و بیلیرم.

دستکی قویورام. تلفونون زنگ چالماسی یئنه ده ائشیدیلیر، آمما گئت به گئت گؤزلریمی بیر آغیر یوخو آلیر.

              داود اهری

              اهر- 4/4/77