ایکی شعر 

  زامان پاشازاده

• ایکی شعر
• زامان پاشازاده 

ایتیک 

یالقیزجا چؤللرده بیر منم،

و  ترسینه ناللانمیش آیغیر بیر آت!

الیمده آغ بایراق

و بؤیرومده قیلینج‌سیز بیر قین.

یول آیریجلاریندا آتیم قرارا چیخیر،

اوْوساریم بئلینده چکیلیر.

 تانیش داغلاردان، تانیش ده‌ره‌لردن

بیر سالاما تامارزی یورویوروک .

داغلارا باغیریب سالام سؤیله‌یکده،

هوروش‌لر قایتاریر داغلار!

و سس‌سیزلیکله یاللاییرام ییرتیجی شاشقین لیغیمی.

بارماغیم؛

 مورگه‌نه‌لر یئمی اولموش خریطه‌ده، گمیریلیر.

آیاغیم؛

قبیر- قبیر آغیز آچمیش تورپاقدا، سوْمورولور.

بیر ایتییین آردیجا،

نه‌لر ایتیردیییمه اوشه‌نیرم

و ایتیریلدیییمی دوشونورم.

اووووی بؤیرومده‌کی بوشلوقدا ساللانان قاخینج!

اووووی اللریمین قاباریلا یوغرولان قیلینج!

هانکی ساواشلار؟

هانکی اللرده؟

هانکی اوره‌کلری ایکی‌یه بؤلورسن؟

یوخسا هانکی قالیق قیزین جئهیزینده

قانلی قین‌لاردا چورویورسن؟!

زَهَرله سوواریلیب،

هانکی موزئی‌لری بَزه‌ییرسن؟

اؤلومدن بئتر بو حئیرانلیق،

بو یالقیزلیق،

          توتارسیزلیق.

صاباح قیلینج دئیه

اوغلوم منی ایزله‌یرسه

نئجه تاپاجاق سنی نئجه؟

ترسینه ناللانان آتیم‌می سوچلو

یوخسا گووه‌ندیییم او نانکور نالچی؟

 زامان چوخورو

گئجه 

ساعاتیمی قورموشام تکرارلاریما

قان بویالی بیر کابوس لا قول بویونلوقومدا

بیرآدام،

تبریزین ساعاتینین سارقاجیندان آسلانمیشدی

ساعاتین عقربی شافاقدا تیتره ک ،

اونون گؤزلرینده

دان یئری آغاریردی .

بوتون پولیس تئلئفونلاری ایشغال

و تئلسیز لرده بیر اینتیحار خبری .

جان قورتاران قوروپلار

روحی خسته لیک لر اوزمانی

و مین لرجه گونو باتمایان تاماشاچی

تبریزین ساعات قاباغینا توپلانمیشدی .

آرا سیرا قورخاق تاماشاچی لار

دئدی قودولار

وبوش بوغازلیقلارلا

بوشلوقلارینی دولدوروردولار:

- بلکه ده عاشیق دیر

- بلکه ده کئفلی

- بلکه ده یوخسول دور

- بلکه ده ده لی .

آنسیزین بیر گور سس

سیندیردی سوکوتون پیچیلتی لارین :

آه ای آرخاداش لار

هوروچک آدام دئییلم من

بوراسا ایفئل زیروه سی دئییل

هئچ کیمسه نینده رئکوردون سیندیرماق ایسته میره م

حایاتی سئویرم دلی جه سینه

دلی دئییلم

ساده جه یورقونام

زامان چوخوروندا لیل لنمیش سو تک

و بو ساعاتین دیشلی چارخی آراسیندا

گؤز به بک لریم خینجیلیر

سوموکلریم سانجیلیر .

بیزمی دئییلدیک قاش قاش زامانی بؤلدوک؟

بیزمی دئییلدیک نئجه ایستردیک سوره ردی زامان؟

ایندیسه بؤلونموشوک قاش قاش اؤزوموز

و زامان دایانیب دیر سورونوروک بیز

آه ای آرخاداش لار

آه ای....

***

او بیر وعدی وئریلمه میش پیغمبر ایدی

او «تک  اویونچو» تاماشاسینین اویونچوسو

گونش کیمی دوغولدو

آی کیمی باتدی .

او گئجه

ساعاتیمین زنگی چالمادان

اویاندیم یوخودان

دان اویانمادان .