«ای دو...ست،ای دوست!»
کیان خیاو
«ای دو...ست،ای دوست!»
ای دو...ست،ای دوست!
بیزیم کوچهلریمیزده
تییهسی کوت بیر قیریق داییرهدیر آی
و کوچه آداملاریمیز
گزیشیر آی ایشغیندا،آیا باخمادان.
باخسان قاپیلاریمیزا
یئددی قیفیل گؤرهرسن بیر آچاریندا.
و آغاجلارین باشیندا
قوشلارین قویدوغو یومورتالارین
لاخ چیخدیغینی.
ای دو...،ای دوست!
بیزده گولومسهمهلر جان دردیدیر
ههره بیر دیش ووروب گئدرقیزارمیش قلبیمیزه
چؤتلیده بئله قالماز بیری لرینین الینده.
گوللریمیز کول قوخویار
و رئکلام تابلولاریمیز
و قیز فوتولاریمیزدا
حیات یوخ،اؤلوم دانس ائدهر.
ای دو...ست،ای دوست!
سوسدورولدو سن گؤرودویون دنیزلر
باخماکی ناققا بالیقلار
شنلهنیرلر هله فیرتیناسیندا.
و بیز همن عاشیقلی کروانلاریق
ایلغیم باسمیش یوللاردا ایتیب باتمیش.
ای دو...ست،ای دوست!
بوردا خیال-خولیا قوروق
بوردا بارماقلار قاداغا.
گؤزلریمیزده قاندان تور
باشلاریمیزدا گون ها گون بؤیوین تومؤر.
بیر داملا بئله قان آخماز،
نئچه یوزمین داماردان.
وساچلار،آه،ساچلار
بیلینمزهاچان آغارار.
و سن نه اومورسان
آیداایکی یوزمین تومن ماعاشلی بیر کیشیدن؟!
ای دو...ست،ای دوست!
بیلسن پاسلی پردهلرین آردیندا
نه حیسلر کئچیردیم آرتیق؟!
بیلسن نئچه یوللار گئتدیم،نئچه دیلده دانیشدیم؟!
بیلسن چؤرهک پولوم بئله نهدن چیخدی؟!
اویسا من دوست کیمی باخدیم قارّهلره
وطن منه دوشمان-دوشمان باخارکن.
و یئریمه دونیانی اؤپ دئدیم سنه
دونیانی اؤپ!
و سلام سؤیله،
سلا...م!
ای اینسانینی آچیق-ساچیقلیغی، ا...ی!
مورداد آیی 1386