X
تبلیغات
رایتل

 

  

  بیر شعر  

  کیان خیاو

 

 

·     چاخیر دویغولار

·         کیان خیاو

 

 

یوخ، یالان دئیه بیلمه‌ره‌م سنه،

اؤلوم هاواسینی نفس چکدیم بیر عؤمور.

داش اوستونده اوتورموشدوم

دؤرد بیر یانیمدا بؤیولر قایناشیردی.

پاییز پوزموشدو دونیامی، سئودیجه‌ییم!

هر گون گونش

اومود اوفوقلاریمیزی،

ایشیلداتمادان باتدی.

و یاغیش یئرینه

    دوزلاق یاغدی اورتامیزا.

تورپاغی آراشدیردیم

بئر نوولاری، بنؤوشه‌ تک

گؤن ده‌ریلر آراسیندا بوینو بوکوک گؤردوم.

ده‌لی آتلار اؤلموشدولر.

ده‌لی آتلارین یانیندا،

قارامان قوشلار وار ایدی

    قانادلاری قوورولموشدو.

سونرا درین ده‌ره­لره اوز توتدوم

گونئیده دردلی داغلار،

سیخ ـ سیخ سیرالارلا مه‌له‌ شیردیلر.

قوزئیده مئشه‌لر،

مئشه‌بگلری یله بیرگه یانیردی.

اورتاداسا بیر چای حسرت قوخویوردو:

دالقالاریندا  یابانجی دامغالارین ساغالمایان یاراسی

پوشگونده بؤهتانلار

و آدینا هذیانلار قوراشدیریلمیش بیر چای.

و گؤزومده وطن،

ـ سانکی دونیا بویدا بیر قیزیل کؤز ـ

   ده‌میر ماققاشلار دیشینده قلپه‌لندی.

من هایقیردیم

توفکلر بوینومون کؤکونه جومدو.

سسیم قانا قویلانمادان، قاچدیم

آمما هارا قاچدیمسا،

سانکی دؤرد دار بوجاق منی قوجاغلادی.

سانکی دؤرد دار:

                    ـ بورا وطن!

ایندی سینه‌م

فیرتینالار سینه‌سینه قارشیدیر

پنجه‌م قارا توفانلارین پنجه‌سینه.

غضب قانیم داماریمدان چیرتلاییر، هئـ…ی!

آخشامین خئییره قالسین، چیچه‌ییم!

من سونسوز بیر گئجه‌یه چیرپینیرام

                            اولدوزسوز بیر حیاتا.

اوره­ییمی بولودلارا بله‌دیم.

گول سئودانی،

بیر آرمودو ایستیکاندا،

باشیما چکمه‌لی‌یم.

بیرده سیقاریملا بیرگه

کول قابینا چؤکمه‌لی‌یم

     دالغین و دولغونجاسینا.

آمما سن اؤلومه اینانما!

عیصیان غوغاسینا قاتلاش!

و دوردوغون دوراغلاردان گئرییه دؤنمه!

من، کؤلگه‌می

شه هر‌لرین یوخوسونا داغیتماق ایسته‌ییره‌م.

چاخیر دویغولاری داها،

اوره‌ییمه دولدوردوم

چاخیر قایغیلاری‌ داها، بئینیمه.

و سنی بیر سانجی کیمی

و سنی بیر سونگو کیمی

و سنی بیر سازاق کیمی،

          بؤیرومه ساپلاییب، گئتدیم.

اوزوم داغلارا ساری دیر.

یالقیزلیغیم،

بؤیوک آیریلیغا دؤنور.

آغزیمداکی سون شئعیریم

الویداعا دؤیونور.

آمما گورزه‌لر گؤزونده

زول دوراجاق دیرناغیمی دوشونوره‌م،

آمما سنین آدینی بیر قیلینج کیمی،

 قانداللار اوزه‌رینده.

بودور، واردیم

و بیر ده‌لی کوتان کیمی،

چایان چنبرینه چیرپدیم اؤزومو!