ایکی شعر بیر شاعیر 

  پرادیب اوماشانکار

پرادیب اوماشانکار

پرادیب اوماشانکار Pradip Umashankar  ، هیندوستانین معاصیر شاعری دی. او، 1934 ده کرالادا  Kerala  ، بیر نایار Nayar فامیلیاسیندا آنادان اولدو .نایارلار بیر قوم دیلار کی، بو یاخینلیغا دک اونلارین آراسیندا مادر سالاری (آنا بی لیک) قالیردی.

اوماشانکار بمبئی شهرینده تحصیل آلدی و اوردا یاشاشیر. آنجاق اونون اصلی ایشی یازیچیلیق و شاعرلیک دی. او ایندییه قدر  مالایالام  Malayalam دیلینده دؤردن آرتیق ناغیل توپلوسو  و یئددی دن آرتیق شعر توپلوسو  و «باشقا ماهنیلارلا» آدلی انگلیس دیلینده بیر شعر توپلو سو یاییب.

(مالایالام هیندی دیلینین قوللاریننان بیری دیر).

اونون تاج محل پئنجره سینن آدلی شعر کتابین محمود کیانوش فارسجایا و من بو ترجمه دن، بیر نئچه شعرین ترکجه یه قایتارمیشام.

اوماشانکارین لیریکاسی یامان گوجلو دور، اونون بو شعرلری سیزیلتیلی، حسرت ماهنیلاری دیر. آرزیلیرام گلجکده اونون شعرلری اؤز آنادیلینن و آزی انگلیسجه دن دیلمیزه چئوریلسین.

                                                                                     ناصر مرقاتی 

قورتولوش

داغیناق باغیرتیلاردا یووا سالماز قورتولوش

اینجیکلی لره سؤیله بیر قول بوتاغ قورسونلار

گونشه قدر دیکلمیش

یئر اوزونه یاییلمیش

گئجه گتیرنده تکلیکله قورخو، منیم ائویمه

گونش تازا دوغوب سنین ائوینده

و کؤلگن داها سنین غنیمین دیییر.

بیر مهربان سفرداش دیر

بلکه ده قورتولوش، اؤز سورگونلویونده

نئچه آن

باغیرتیلاریوین کؤکسوز بوداغلارینا قونا؛

آما اونوتما کی هله ده گئجه، منیم ائوجییمده یاشامادا دیر

و گونش ایسه سنین  ائوینده قالمییاجاق دیر.

اینکار  

بیر جولا گؤرورم

بیر سهوین سونسوزلوغونا آچیلمیش

بیر یارایا بنزیر کی

دامارلارنین اؤلن دویونتوسونده

گیزلی بیر باغیرتی وار

باخیشیم تأییدله دیییر :

" هــن، آجلیق !"

و من یئنه بیر جولا گؤرورم کی

بیر گوله بنزیر

آچیلما  هنگامه سینده

و اوره ییم اینکارلا دیییر :

"یوخ ، یوخ یارامازلیق دیر".