غوربتین اسگی تانیشی
داود اهری
غربتین اسکی تانیشی
داود اهری
بو شه هه ر ده نیز کیمی دیر.کئچه جکده من ده نئچه ایل بو شه هه رده یاشامیشام. اردیبهشت آیینین ایکینجی یاریسیدیر.هاوالار بیر آز قیزیبدیر.نئچه گوندور کی بو شه هه ره گلمیشم و ناهاردان سونرالار پیادا یول گئتمک اوچون ائودن ائشیگه چیخیرام.
بو گون ده دؤرد یولا کی یئتیشدیم یولدان کئچن پیادا چراغی قرمزی ایدی.همین کی یاشیل اولدو من و باشقا یولدان کئچنلر یولا دوشدوک.هئچ بیلمه دن ساغ یؤنومه باخدیم و اونو گؤردوم و چوخ تعجوبلندیم.بیر قادین ایدی منیمله قددی بیر و من یاشیتدا.قیافه سی بوسبوتون منه اوخشاییردی.سانکی اونو اوشاقلیقدان تانیییردیم. او دا منه زیلله نمیشدی و باخیشیندا او دویغو دالغالانیردی. بیر سؤز سؤیله مه دن برابر یول گئدیردیک.ساغ یؤنه دؤندوک.ائله بیل بیر سیرریلی قوووه هر ایکیمیزی قاباغا آپاریردی.بیر خیردا پارکا یئتیشدیک. پارک سایخاش ایدی. او بیر نیمکتین اوستونده اوتوردو و من ده یانیندا اوتوردوم.باشلادی دانیشماغا.سسی منیم سسیمه اوخشاییردی.بیر گیزلین کدر سسینده وار ایدی.دئدی:
- نه عجیبه اولایدیر! بیز گره ک بیر بیریمیزایله گؤروش ائتمه یه ایدیک.آمما بو اولای اولوبدور.من بو شه هه رده یاشاییرام.هر زامان گؤزلریم سنی آختاراردی و بو گون گؤزله نیلمز سنی گؤردوم.شاید اؤزو خبرین اولمایا .من سنین روحوندا یاشاییرام.بوتون یازدیقلارین، شعر،مقاله وناغیللار منیم دیلیمدن گلیبدیر.من سنین ناخودآگاهیندا یاشاییرام و سنین اوچون هنر الهامینین قایناغی یام.یادینا گتیر او رسملری کی چکیبسن.سن منی گؤرمه یه احتیاجین یوخدور.هر واخت اوره یین ایسته سه منیمله ایلگی باغلایا بیلرسن.
حیاتیندا بیر ایش گؤرمه کی منیم خاطیریمی اینجیده سن. کی او واخت من رحمسیز اولارام و الیوا ایش وئره رم.آمما هر قدر یاخشیلیق ائله یه سن و حقیقی بیر انسان اولاسان او قدر سنه مهربان اولاجاغام و ائله یه بیله جکسن بؤیوک ایشلر گؤره سن.من بو بؤیوک شه هه رده یاشاییرام و سن اؤز کیچیک شه هه رینده.بیر گون کی حیاتین سونونا یئتیشک برابر اولاجاغیق و داها نگران قالمایاجاغیق.ابدی دینجلیک بیزی گؤزله ییر.من ده سنین کیمی صبر پئشه ائله میشم .حیاتا وورغونام و چاتیشمازلیقلارا باخمایاراق اومودومو الدن وئرمه ییرم و او گونون یئتیشمه سینه ثانیه لری ساییرام کی یئنه ده همیشه لیک کناریندا اولام.بؤیوک کدرلرینده و کئچری شنلیک لرینده همیشه سنینله اولموشام و سونونا قدر اولاجاغام.حیات یولداشینا هر یاخشیلیق ائله سن ائله بیل منه ائله ییبسن.چالیش همیشه اونو سئویندیره سن و یالنیز بیراخمایاسان .او دا اؤز تانیشین گؤزله ییر.انسانلارین هامیسی اؤز ایتمیش یاریملارین آختاریشیندادیرلار.غافل کی اونلار هر زامان اونلارین یانیندادیرلار .اونلار ایلا گولورلر،آغلاییرلارو حیاتلاریندا اورتاقدیرلار.
کئچن ایللرده حیاتین فلسفه سین آنلاماغا و حقیقتی تانیماغا چالیشماقلارین منه عزیز و چوخ ده یرلی دیر.ایندی داها دینجه لیبسن و بوش یئره فیکریوی بوش و باطل فیکیرلره قویمورسان و اؤز گوجونو هدره وئرمه ییرسن.او اویاقلیق و یاتمامازلیق گئجه لر میوه وئریب و بو دونیادا دینجلیک تاپیبسان.
سئوینجلریوی اؤزگه لرایله پایلاش و اونلارین کدرلرینده اورتاق اول.او گونون اومودوندا کی یئنه ده حیاتین سون آنلاریندا بیربیریمیزایله گؤروش ائله یک!
اوزومه باخدی و کدرله گولومسه دی. یانیندا کی چانتادان بیر قرمزی آلما چیخارتدی و اونو ایکی بؤلدی.آلمانین عطرینین قوخوسو هاوایا جالاندی و من کئفلندیم.بیر بؤلومون منه وئردی و او بیری بؤلومون دیشینه چکدی. من ده باشلادیم یئمه یه.شیرین و چوخ لذتلی ایدی.
من بوتون بو مدتده سوسموشدوم. اصلا دانیشمامیشدیم و اونون سؤزلرینه اووسونلانمیشدیم. آلمانی یئیه ندن سونرا قالخدی و دئدی گره ک گئتسین. گؤز یاشلاریمیز آخدی. ائله بیل گؤزگوده اؤزوموزه باخیردیق. سوروشدوم:
-آدین نه دیر؟
یاواشجا دئدی:
-آنیما!
سونرا وداعلاشیب و یاواش-یاواش بیر قانادی یونگول کؤلگه کیمی اوزاقلاشدی.
من قالخمیشدیم و اونون اوزاقلاشماسینا باخیردیم. گئت به گئت گؤزلریمین قارشیسیندان گیزلندی و من کدرلی و دالغین اؤز پیادا یول گئتمه ییمه داوام وئردیم. هله ده قرمزی آلمانین عطرینین قوخوسو هاوادا دالغالانیردی...!
1 خرداد 86
اهر-داود اهری