گؤی قورشاغی
ائلیار پولاد
گوی قورشاغی
ائلیار پولارد
گونون اورتا چاغیدی. یازیاغیشی شیدیریغاما یاغیر. تله سه ره ک ائوه گلیره م. اوست-باشیم تامام ایسلانیب. ایچه ری گیردیکده ، ائله گیره جه کده اوست پالتاریمی سویونورام. عایله م بیرلیکده ائوده دیلر. من ایچه ری گیره ر گیرمز ،اوغلوم قاچیر قاباغا:
- سالام آتا، آخشام سوز وئرمیسن بو گون منله توپ اوینایاسان.
منده جاواب وئریره م:
- اوغلوم باییردا یاغیش یاغیر، ایندی اولماز. نئینه ک یاغیش کسسین گئدیب حیه تده سنیله توپ اوینارام.
زامان اوتور و یاغیش کسیر. اوغلوم دا منده ن ال چکمیر. نهایت بیر یئرده حیه ته چیخیریق.
هاوا چوخ اوره یه یاتیمدی. یاز یاغیشیندان سونرا هر نه تمیز و گویچک گورونور.
اوره کلره سئوینج پایلانیر. کوچه ده ن اوشاقلارین ویئنی یئتمه لرین های – کویو گلیر.
اونلاردا یازین ایلیق هاواسیندان ذووق آلیرلار.ائله بو آن اوغلوم هیجانلا، بارماقیلا گوی عالمین منه گورسه ده ره ک سوینجله قیشقیریر:
-آتا، آتا باخ "رنگین کمانا" باخ. نه قده رده گوزه لدی؛
منده گوی قورشاغینا باخدیقدان ، اوز توتدوب اوغلوما و دئیره م:
- هه چوخ قشنگدی، آما او"رنگین کمان" دئییل. او گوی قورشاغی دیر اوغلوم.
اوغلومون چوهره سینده اولان تعجوبلی حیسسی دویدوم. اوزامان اوغلوم سوزه گلدی:
- آتا. او "رنگین کمان" دی. ائله آنامدا ، کوچه ده کی اوشاقلاردا و حتا باخچامیز داکی موعلیمه ده اونا "رنگین کمان" دئییر.سن منه یالان دئمه زدین بو دونه منی نییه آلادیرسان؟
منی فیکیر گوتوردو. ائله بو صوحبتلر منی بیر آز سارسیتدی. اوغلوم دا بو حیسسی دویاراق منه دئدی:
- آتا نه اولدو . نییه کئفسیز اولدون؟
بودونه من اوغلوما یالان دانیشدیم:
- اوغلوم بیر آز باشیم آغرییر . سن بو دفه گئت کوچه ده یاشیدلارینلا اوینا. سوز وئریره م، بیر آزدان گلیب منده سنلن اوینارام.
اوغلوم کونولسوز منده ن آیریلیب کوچه یه گئتدی .
منده حیه تین پیلله سینده اوتوروب خیالا دالدیم.ائله اوزامانی دوشوندوم کی اوغلوم یاشیندا اولاردیم . گونلرین بیر گونو آنام حیه تده دولاشیر وسیل-سوپورله مشغول ایدی. منده اوز- اوزومه نه سه حیه تده آختاریردیم. بیرده ن گوزوم گویده کی گوزه ل بیر منظره یه دوشدو. سئوینه ره ک آنامدان سوروشدوم:
- آنا. او نه دیر؟ گور نه قده ر گوزه ل دیر.
آنام گولومسه یه ره ک دئدی:
- هه اوغلوم، او فاطما خالانین حاناسی دیر.
نئچه گون اوستونده ن کئچدی. بیر گون آخشام اوستو آناملا قونشو حیه تینه گئتدیک. ائله آستانادان ایچری گیردیکده حیه تده بیر منظره گوردوم . من گؤیده اولان فاطما خالانین حاناسی نی، یئرده گوروردوم. ائله بو آن سئوینه ره ک هیجانلا قیشقیردیم:
- آنا _آنا ،باخ . فاطما خالانین حاناسی. نه قده رده قشنگدی.
ائله بو آن حانانین یاخینلیغینا چاتمیشدیم . الیمی حانایا سورته ره ک گوزوم حانانین ایلک و آخریندا اولان یئره باسدیریلمیش آغاجلارا دوشدو. منجه حانانی آغاجلارا باغلامیشدیلار. یئنه آناما دئدیم :
- آنا باخ. آغاجلارا باغلاییب لار کی گویه اوچماسین. یوخ؟
ائله بو آن قونشو قادینی ائوده ن حیه ته چیخیب و آناملا ساغولاشاندان سونرا من یئنه آنامدان سوروشدوم:
- آنا فاطما خالا بودور؟ نه یاخشی. ائله بیز نن قونشیمش کی.
آنام اوجادان گوله ره ک دئدی:
- یوخ اوغلوم بو اسمر خالادی. بو حانا دا گویه اوچماز. اسمر خالا اونو آغاجا باغلاییب کی اوزه رینده گویچک ناخیشلار سالا بیلسین. او کی قالدی گویده کی نه، او دا گوی قورشاغی دیر. ائله بئله جاماات آراسیندا اونا فاطما خالانین حاناسی دا دئیلیر.
من دای دینمه دیم. اسمر خالا گلدی اوتوردو و ایشله مه یه باشلادی. من اونون بارماقلاری و اللری نین حرکتی نی ایزله ییردیم. او هر حرکتده بیر بویا ناخیشا آرتیریردی. گوز اوخشایان ناخیشلار هر آن اوتدوکجه، بیر رنگه دوشور وگوزه للشیردی. اسمر خالا ایشله یه –ایشله یه حزین ماهنی لار زومزومه ائدیردی. اونون ماهنی لاری نه ده نسه منده بیر نیسگیل و یا حسرت اویادیردی. ائله ناخیشلاردا اولان اینجه لیک و ماهنینین ملاحت لی یی منه سئوینج دولو – کدرده باغیشلاییردی.
ایندی یئنه ده اوماهنی لار وناخیشلار گوزوم اونونده جانلانیروقولاغیمدا عکس–صدا یارادیر. و من دوشونوره م کی:
- گوره سن اوغلومون اوشاغی "گوی قورشاغین" اوندان سوروشاندا هانسی دیلده آدلاندیراجاغ؟.
2/ایسفند/1385