شه هر
کیان خیاو
اؤلوم اوپوشوندن یانمیش له لکلر توپلوسوندان
شههر آغلاغان
شههر گولش
شههر عادیجه بیر شههر.
آیاغلانان سیرا داغلار اورتاسیندا
گاه آرخایین، گاه قورخاق.
ائولری خانا ـ خانا
ائولری کؤندهلن.
آغاجلاری تابلو
آغاجلاری اعدام دیرهکلری.
و داها هر شئیی آجی
هر شئیی سویوق.
اولدوزلاری ایشیقسیز
قیزلاری یاراشیقسیز.
و بیلینمز هانکی قارٌهنین هانکی مملکتیدیر.
بیز یورقون ـ آرقینجا
دومانلی اوفوقلارینی اوخویوروق
بیریمیز دوغودا شاه
بیریمیز باتیدا مات.
بهبهنکلر بولوارلاری باهارلاندیرمیش
و بولودلار
یاغمایاجاق کیمی چؤکموش پنجرهلره.
من قارا سو قیراغیندا
یورقون اوچوشلو بیر قوشام
قانادیمدا ساز
دیمدیگیمده سؤز
دؤشومده گونشین قیزیل آلماسی.
حیات، شهههرین اوزونده
کوکورتله یاندیردیغیمیز بیر سیقاردیر.
اؤلوم
هر گون ایچیب دویمادیغیمیز آجی چای.
و عشق
نه یایلاغی یایلاق
نه قیشلاغی قیشلاق
اؤتهری بیر اوتوراقدیر خیالدا.
آخ، بو جنت!
سگگیز قاپیسینین سگگیزی ده باغلی.
آخ، بو جهنم!
قان امیجی تانریلارین اویلاغی.