X
تبلیغات
رایتل

   

 

 

  گون باتان چاغی 

  داود اهری  

 

گون باتان چاغی

         بو گون جمعه گونودور.داریخیب ائودن ائشیگه چیخمیشام.شه هه رین پارکی شولوغ ایدی.بیر دوندورما آلدیم.تا نیمکت اوستونده اوتوردوم اونو یاخینلیغیمدا گؤردوم.سسله دیم.الینده سیگارئت وارایدی.گلدی کناریمدا اوتوردو.فندکیم ایله سیگارئتینی آلیشدیردیم.کدرلی ساغ آیاغینی یئره ووروردو.دوندورما تعارف ائله دیم.دوندورمانی آلدی ، آتدی آیاغینین آلتینا و ازدی.سونرا سوسقون قالخدی گئتدی.هله ده گؤروردوم کی یئنه ده آیاغینی یئره دؤیوردو.قالخدیم ، گئتدیم بیر آیری دوندورما آلدیم.

         پارکدان چیخدیم ائشیگه.کوچه نین قورتاراجاغیندا ، اورادا کی ائولرین راستاسی قورتولوردو دوردوم.آشاغیدا نسبتن بیر بؤیوک یئرده ، مه که تارلاسی گؤرونوردو، اوندان یوخاری دا اسکی قبرستان کی او طرفین ائولرینه قوووشوردو.بو ایل بیر دؤنه یازین اولینده کی بورایا گلمیشدیم قویونلار قبرستانین تزه گؤیه رن اوتلارینی اوتلاییردیلار.

         گونش گئدیردی کی باتسین.گونشین باتماغینی چوخ سئوه رم.آمما عادتن بیر آیری یئرده گونشین باتماغینی گؤزله یرم و چوخداندیر بیلمیشم کی گونش هئچ زامان بیر یئرده باتماییر و چیخماسی دا بو جوردور.

         گؤزله ریمی مه که تارلاسیندان اسکی قبرستانین او طرفینده کی ائولره دیکیرم. انقلابدان سونرا اوراداایدی کی دوستومون عائله سینه بئداوا بیر ائوجیک وئردیلر.نئچه ایلدن سونرا ائوی ساتیب و آخیردا تهراندان باش چیخارتمیشدیلار.دوستوم منیم هم صینیفیم و انقلاب چاغلارینین دوستلاریمدان ایدی.نئچه ایل قاباق، نئچه دفعه اونو جرّاحلیق ائله میشدیلر .نئچه ایلدن سونرا بیر ایکی دؤنه گؤروشموشدوک .تا اینکه ائشیتدیم سونکو جراحلیق عملینده تام هوشسوزلوق حالتینده دونیادان گئتمیشدی.بیر عزیز دوستون کدرلی الدن وئردیگیمدن سووای ، بیر مدت اونون نه جور اؤلمه سینه فیکیرله شیردیم و دوز بیر مفکوره یه چاتمامیشدیم.تا اینکه بیلدیر منیم ده یولوم جرّاحلیق عملینین اوتاغینا دوشدو.

         چون ایلک دفعه ایدی کی عؤمرومده بو مسئله ا یله اوز به اوز گلمیشدیم ، ایستر ایسته مز اوره ییمین تکینده بیر گیزلی و تانینمامیش تلواسه وارایدی.آمما نه هوشدان گئتمه گیمی بیلدیم و نه تام هوشسوزلوق زامانیندا نه اوز وئردیگینی.حتی یوخو کیمی ده دئییلدی کی بیر رؤیاسی دا اولسون.هوشدان گئتمه زامانیندان تا او واختاجان کی یاواش – یاواش هذیان حالی ایلا هوشا گلدیم هئچ بیر شئی ، هئچ بیر دویغو یادیما گلمه ییردی و منه فرق ائله مه ییردی کی هوشسوزلوق زامانی بیر ساحات ، یا ایللر چکه ایدی و یا حتی داها سونراسینا هوشا گلمک ده اولمایایدی.

         نئچه نفر منیم دوستلاریمدان دا منیم همان خسته لیگیم و دردیمدن چکیردیلر و همیشه او باره ده دانیشیردیلار ، آمما من هئچ بیر سؤز دئمه ییردیم.عملدن سونرا موضوعنو اونلارا دئدیم.شاشیردیلار.منیم خسته لیگیمدن خبرلری یوخ ایدی.گوله – گوله دئدیم:-من دانیشمارام ، عمل ائله رم و جرّاحلیق عملینین هئچ قورخوسو یوخدور.

         دوستلاریما دئدیم بو عمل منه بیر بؤیوک تجربه ایدی.من اؤلومو تجربه ائله میشدیم.داها اؤلومدن هئچ‌ بیر قورخوم یوخ ایدی، البته دردسیز اؤلومدن ،خبرسیزلیک عالمینین اؤلوموندن ، کی درددن قاچاغام.

         گونش داغلارین دالیسیندا باتیب . اوفوق قرمزی یا چالیر.مه که تارلاسینین او طرفینده ، اسکی قبرستان و ائولر گؤزلریمین قارشی سیندادیرلار.شه هه ره دؤنورم.

         خیاواندا اسکی بیر ماهنی نین آهنگی ذهنیمده چالینیر.دوستومون عکسی گؤزلریمین اؤنونده جانلانیر.باشلاییرام ماهنینی زمزمه ائله مه یه :-بو آتوشگه لرین ایسلانمیش رامکاسیندا /بیر کدرلی جمعه نین عکسینی گؤرورم/نه قارادیر اینینده یاس گئییمی/گؤزلرینده آغیر بولوتلار گؤرورم/قارا بولوتدان ...

         هاوا قارانلیقلاییب.هئچ بیلمه دن ایسته ییرم من ده آیاغیمی یئره دؤیم.یئر تقصیرکاردیر.دئییل می؟ پس تقصیرکارکیمدیر؟ ساحات نئچه دیر ؟نه فرق ائله ییر ، من کی چوخداندیر قول ساحاتیمی آتمیشام گئدیب.هاوا قارانلیقلانیب و بو گون جمعه گونودور ، بیر کدرلی جمعه ...!

                                                                               داود اهری

                                                                            اهر- 21/5/79