سنی آراییرکن

  کیان خیاو

یاشاماق اوچون، بیر قانلی کؤینک یئتر

اؤلمک اوچون، بیر آزمان قبیر.

من سنه آللی ـ گوللو باغچالاردا یوخ

آی ـ اولدوزلو اوزاق اوزای‌لاردا یوخ،

بیر آزمان قبیر ایچینده،

         بیر قانلی کؤینک‌له واردیم.

بؤیوک یالنیزلیق‌لاریمدا سنی گزدیم.

بوردا اؤیله یارالار وار ایدی کی

نه داغ چیچک‌لری، نه آنا سودو،

                قوروتمازدی قانینی.

سنی تاپدیم آختارمادان

و آدین ـ سانین یوخکن.

یانیمدا اولمادان بئله سنه قیزیندیم.

گؤی‌لردن بیر قیزیل آلما یئتر، دئدیم

داغ‌لاردان بیر بوز قورد اولاییشی.

آمما بیردن بیره، ـ حئیرانام ـ نه­دن،

هر شئیی خاطیرلاتمادان اونوتدوق.

اودلار یوردو تالانمیشدی من سنی آرایاندا

سن یاندیریلمیش کیتاب‌لار کولونده یاتمیشدین

و منده بیر فیضولی آهی چکیلیردی؛

جییه‌ری سؤکورجه‌سینه.

بوتون تاریخ بیر مؤوسیمده

بوتون مؤوسیم‌لر بیر گونده تالانمیشدی.

و چالدیراندا دا، آخ

نه چیلدیران چیچک‌لر تؤکولمه‌میشدی!

آرتیق آرازدان قارا یئل‌لر اسیردی

سنی ایتیرمه‌دن تاپدیم.

گوناه‌سیز و سیلاح‌سیزجا

سیغینمیشدین شئعیر دوستاغی‌نین بیر بوجاغینا.

آدین آنا سودو قده‌ر دوغمایدی

دادین آتا قازانجی کیمی حلال.

دوستاقدا باریش دوشونن بیر سؤز کی

سانکی قوجامان داغ‌لاردا بیر گنج بایراق.

بو دوستاقدا

دونیا گئنیشلییی سنین اوچون ایدی.

و من سنه دئدیم کی

دونیا گلیملی ـ گئدیملی اولمالی‌دیر هر زامان

آمما سن ده بیر شئی‌لری باغیردیغین یئرده

آغزین «آ……» شکیلینده آچیق قالمالی‌دیر

                    دمیر آشیق تک!

سنسیز نه یئددی گؤیومده بیر اولدوزوم واریدی

نه ده یئددی گؤی گؤلومده بیر داملا سویوم.

اورتادا یالنیز سن ایدین قاچینیلماز

آلنیمین چیرکین یازیسی اولسان دا.

سنی سئودیم سئوه‌رک

و گؤزلریم

یئددی گؤی گؤل قیراغیندا

یئددی گؤی اولدوزلارینا دیکیلی قالدی.

آمما نه یئرده، نه گؤیده

یالنیز سنی شئعیر دوستاغیندا تاپدیم؛

قانلی کوینه‌یینله، آزمان قبیرده.

گؤیسونده آغیر یارالار وار ایدی

آمما داها نه داغ‌لاردا چیچک

نه ده آنالار دؤشونده سود قالمیشدی.

یئنه، درین دوشونرسن‌سه، دئدیم،

بو دوستاقدا بیر دونیا گئنیشلییی وار.

و سن بو دونیادا

گیزلی آچان چیچک‌لرین چیتیسن

گیزلی پارتلایان بومبالارین باریتی.

فقط

یاشایاندا، اؤیله گؤزل یاشا کی

وارلیغین بوتون اؤلوم‌لره مئیدان اوخوسون.

و آد ـ سانین بلیرسیزکن،

سنی تاپسین شاعیرلر!

و اؤلنده، اؤیله گؤزل اؤل کی

اؤلومسوزلویون بوتون قاپی‌لاری آچیلسین اوزونه.

و دوققوز مزار یئتمه‌سین گؤوده‌نه

              بابان یونوس ایمره تک!

                        بهمن 1383