X
تبلیغات
رایتل

 

 

 

  بؤیله تاپینیرام سنه ای شئعیر

  کیان خیاو

 

بیر توپال قارتال ایتمیشدین اوزایلاردا

موزه‌لردن آسیلمیشدین.

بیردن بیره گؤروشونو ایسته‌دیم

هاوانی یارمادان ائندین

و آتیشدین قانلی تپه‌لرده

             سانکی قاراداغ توفه‌یی.

بلکه بیر قیزیل آلما شاخیرتیسی‌یدین

بلکه گؤی اوزوندن ائنن،

بیر بالدیری چیلپاق ملئیکه.

یوخسا یورقونلار سویوندان بیر اینسان کی

ووروشدوقلارینا بئله دوشمان دئمز.

وارلیغین مؤعجیزه ذاتاً اسکیدن؛

و یوخلوغون بوللو بوشلوغو دونیانین ائی شئعیر!

بو آن سنین تاراققانی چاتلادیلان ایستردیم

یئل ووردوقجا ییرقالانیب،

دنیز کیمی کوکره‌یه‌سن یئریندن.

بوز دومانلی شوشه‌لری سیندیراسان

آغارداسان داغلار دالینی گونشدن

و کیچیجیک کندلرده

بؤیوک اودلار یاندیراسان،‌ موقددس.

آه، قان کیمی بیر قرنفیل آغزیمدا

آه،‌ قرنفیل کیمی بیر قان اوره‌ییمده!

تکی سنین کانسرینه توتولموشسام، موتلویام.

و سنی بؤیله سئویرم ا...ی، آنلاشیلماز!

ایلدیریم فرمانی وئریب،

اولدوزلاری ائکرانا گتیره‌سن.

سونرا قارانقوش قانی بیر دنیزدن

الجییزی خینالی بیر قیسراق کیمی سیچرایاسان.

من‌سه، قانی‌، قارانقوشو، و سنی

قوجاقلایام، اؤپم، اؤلم ده‌لی‌جه.

سنی بؤیله تاپیرام

ای قارانلیق بیر شئیلره آتیلان ایپک سیلاح!

و بؤیله تاپینیرام سنه، ‌ای شئعیر!

اوزایلار قهرمانی‌کن،

هاوانی یارمادان گلیب،

بوتون اینسانلار آغزییلا اوخویاسان.

و موزه‌لر یاراشیغی‌کن،

شاق ها شاق شاققیلدایاسان

         دونیانی فتح ائتمک اوچون.

بیر ده سنینله بؤیله بیر یاشاماق:

سئوگی اوتاغی سازلانمیش

حاضیرلانمیش؛

هردن یانیما قوناسان چیلپاقجا

نفس ـ نفسه دایایام سنینله!